سابق وزیراعلیٰ پنجاب چوہدری پرویز الہیٰ کا کہنا ہے کہ ہم ان کے خلاف توہین عدالت فائل کریں گے، عدلیہ کا دروازہ کھٹکھٹائیں گے، عدلیہ نے خان صاحب کو انصاف دیا ہے۔ 

پاکستان تحریک انصاف کے صدر پرویز الہیٰ نے زمان پارک میں پولیس آپریشن پر بات کرتے ہوئے کہا کہ  اسٹیٹ کا حلیہ خراب کر دیا گیا ہے، خواتین کا بھی لحاظ نہیں، کیا ان کی ماں بہنیں نہیں ہیں۔

انہوں نے کہا کہ یہاں کوئی تجاوزات نہیں تھیں، زمان پارک میں آئی جی سرابرہی میں پولیس نے اودھم مچایا، ڈاکٹر عظمی گھر میں موجود تھی اور دریافت کرنے پر سرچ وارنٹ نہیں دکھائے گئے اور ان کے شوہر کو بھی پکڑ لیا گیا۔

پرویز الہیٰ کا کہنا تھا کہ ہم ان کے خلاف توہین عدالت فائل کریں گے، عدلیہ کا دروازہ کھٹکھٹائیں گے، عدلیہ نے خان صاحب کو انصاف دیا ہے اور انشاءاللہ انصاف ملے گا۔

انہوں نے دعویٰ کیا کہ یہ آپریشن مریم نواز کے کہنے پر ہو رہا ہے، یہاں کونسی تجاوزات تھی، یہاں کسی نے گنڈیریاں لگائیں ہیں، فلسطین اور کشمیر میں ایسا نہیں ہوا، پورے گھر میں سامان بکھرا پڑا ہے۔

پرویز الہیٰ نے کہا کہ حالات خراب نہیں ہو سکتے کیوں کہ سپریم کورت کا فیصلہ ہے، جتنے دن گزر رہے ہیں عمران خان اور پی ٹی آئی کی مقبولیت بڑھ رہی ہے۔

انہوں نے مزید کہا کہ ان کی خواہش رہی ہے کہ عمران خان کو گرفتار کریں، سوئی ہوئی قوم کو جاگنا پڑے گا، عمران خان نے ہمیشہ قانونی و آئینی راستہ اپنایا۔