پاکستان تحریک انصاف کے رہنما خرم شیر زمان نے کہا ہے کہ کراچی میں امن یقینی بنانے کیلئے سندھ حکومت کی کوششیں کبھی رنگ نہیں لائیں۔

تفصیلات کے مطابق پی ٹی آئی پارلیمانی لیڈر سندھ اسمبلی خرم شیر زمان نے اپنے اہم  بیان میں کہا کہ کراچی میں امن یقینی بنانے کیلئے سندھ حکومت کی کوششیں کبھی رنگ نہیں لائیں، شہر میں کسی بھی انسان کو ایک موبائل کیلئے قتل کردینا آسان ہے۔

خرم شیر زمان نے کہا کہ گزشتہ روز سنی علماء کونسل پاکستان کے صدر علامہ عبدالقیوم کو سر راہ قتل کیا گیا، اس سے قبل پرائیویٹ اسکول فیڈریشن کے خالد رضا کو قتل کیا گیا تھا، وزیر اعلیٰ نے واقعات کا نوٹس لیا مگر عملی اقدام نہیں اٹھایا۔

ان کا کہنا تھا کہ امن وامان کیلئے صوبائی بجٹ 124.87 ارب ہے مگر پیسہ کہاں لگتا ہے کچھ پتہ نہیں، واقف ہیں کہ سندھ کابینہ میں امن و امان کے موضوع کو ترجیح نہیں دی جاتی، سندھ حکومت کے حکم پر کراچی کی پولیس مردم شماری، پولیو مہم میں مصروف ہے۔

انہوں نے کہا کہ سندھ حکومت کے آئی جی اور افسران بےشرمی سے کہتے ہیں ‘کرائم قدرتی عمل’ ہے، صرف قانون پر عملدرآمد سے کراچی کا امن ممکن ہے مگر یہاں قانون صرف ہیلمٹ نہ لگانے یا نوپارکنگ والوں پر لاگو ہوتا ہے۔

خرم زمان نے کہا کہ شہر جل جائے مگر حکومت اور پولیس کی بھتوں سے جیب گرم ہونا ضروری ہے، سندھ حکومت سے مطالبہ ہے سالانہ امن و امان پر رکھا گیا بجٹ بتایا جائے کہاں خرچ ہوا؟ کیونکہ حکومتی کرپشن کی وجہ سے کراچی میں کرائم ریٹ بڑھ رہا ہے۔

ضرور پڑھیں؛ کراچی میں پولیس مقابلہ؛ پولیس اہلکار شہید، ملزمان فرار