ٹی ٹوئنٹی کرکٹ میں کرس گیل کی حکمرانی کا خاتمہ ہو گیا ہے، بابر اعظم نے کرس گیل کا ریکارڈ اپنے نام کر لیا ہے۔

تفصیلات کے مطابق پی ایس ایل 8 میں آج ہونے والے ایلیمینیٹر میچ میں بابر اعظم نے اپنی اننگ کا 35 واں رن لے کر کرس گیل کی ٹی ٹوئنٹی کرکٹ میں سب سے زیادہ رنز کی حکمرانی کا خاتمہ کر دیا۔

بابر اعظم نے ویسٹ انڈیز کے جارح مزاج بیٹسمین اور یونیورس باس کرس گیل کے 9 ہزار رنز کے ریکارڈ کو کم میچ کھیل کر توڑ ڈالا۔

کرس گیل نے یہ 9 ہزار رنز کا اعزاز ٹی ٹوئنٹی کی 249 اننگز میں یہ کارنامہ انجام دیا تھا، جبکہ قومی کرکٹ ٹیم کے کپتان بابر اعظم نے یہ معرکہ 245 اننگ میں انجام دیا۔

یہاں یہ بات بھی قابل ذکر ہے کہ بابر اعظم نے 8 ہزار سے 9 ہزار رنز تک کا سفر صرف 27 اننگ میں مکمل کیا تھا۔

ٹی ٹوئنٹی میں زیادہ رنز بنانے والوں کی فہرست میں تیسرے نمبر بھارت کے ویرات کوہلی ہیں جنہوں نے 271 اننگز میں 9 ہزار رنز بنائے ہیں۔

آسٹریلیا کے ڈیوڈ وارنر بھی اس فہرست میں چوتھے نمبر پر ہیں جنہوں نے 9 ہزار کے سنگ میل کو عبور کرنے کے لیے 273 اننگز کا سہارا لیا ہے۔

واضح رہے کہ بابر اعظم نے عالمی کرکٹ کے سب سے چھوٹے فارمیٹ ٹی ٹوئنٹی کرکٹ میں سب سے پہلے 7 ہزار رنز بنانے کا منفرد اعزاز اپنے نام کر رکھا ہے۔

ٹی ٹوئنٹی کرکٹ کے اعدادوشمار کے مطابق بابر اعظم تیز ترین 8 ہزار اور 6 ہزار رنز بنانے والے کھلاڑیوں کی فہرست میں دوسرے نمبر پر ہیں۔

ریکارڈ بک میں درج ریکارڈز کے مطابق بابر اعظم نے 1 ہزار رنز کے لیے 36، 2 ہزار کے لیے 70، 3 ہزار کے لیے 92، 4 ہزار کے لیے 115، 5 ہزار کے لیے 145، 6 ہزار کے لیے 165، 7 ہزار کے لیے 187 اور 8 ہزار رنز کے لیے 218 اننگز کی مدد حاصل کی۔