عدالتِ عالیہ لاہور نے رہنما پی ٹی آئی شہباز گل کو چار ہفتوں کے لیے امریکا جانے کی اجازت دے دی۔

تفصیلات کے مطابق لاہورہائی کورٹ نے  تحریک انصاف کے رہنما شہباز گل کو چار ہفتوں کےلیے بیرون ملک سفر کرنے کی اجازت دے دی۔

شہباز گل کو 4 ہفتوں کے لیے امریکا جانے کی اجازت مل گئی۔#BOLNews #ShahbazGill pic.twitter.com/bdJB7s2cLn

— BOL Network (@BOLNETWORK) March 29, 2023

چیف جسٹس لاہورہائی کورٹ جسٹس امیر بھٹی کی سربراہی میں تین رکنی فل بنچ نے درخواست پر سماعت کی۔ شہباز گل نے اپنا نام ای سی ایل میں شامل کرنے کے اقدام کو چیلنج کررکھا ہے۔

عدالتِ عالیہ نے شہباز گل کو ایک مرتبہ بیرون ملک سفر کی اجازت دے دی اورشہباز گل کی درخواست پروفاقی حکومت سے آئندہ سماعت پر جواب طلب کر لیا۔

شہبازگل کے خلاف کراچی میں درج ایک مقدمہ منسوخ

اس سے قبل پی ٹی آئی رہنما شہباز گل کے خلاف کراچی میں درج ایک مقدمہ منسوخ کردیا گیا، پولیس نے میمن گوٹھ تھانے میں درج مقدمے کی رپورٹ سندھ ہائی کورٹ میں جمع کرادی۔

پولیس کا کہنا تھا کہ شہباز گل اوردیگر کے خلاف کیس نہیں بنتا اس لیے ایف آئی آر کینسل کردی ہے جس پرعدالت نے پولیس رپورٹ کے بعد درخواست نمٹا دی۔

شہباز گل نے ملک الطاف جاوید ایڈووکیٹ کے توسط سے مقدمہ کالعدم قرار دینے کے لیے درخواست دائر کی تھی، ملک الطاف جاوید ایڈووکیٹ نے مؤقف اپنایا تھا کہ شہباز گل کے خلاف ان کے بیان پر لاہور میں مقدمہ درج ہوچکا ہے، ایک وقوعہ کے مختلف تھانوں میں مقدمات درج نہیں ہوسکتے۔