فرخ حبیب نے کہا ہے کہ مریم نواز سے ریاست پاکستان کو خطرہ ہے۔

تفصیلات کےمطابق پاکستان تحریک انصاف کے رہنما فرخ حبیب نے زمان پارک کے باہر میڈیا سے گفتگو کرتے ہوئے کہا کہ آج آپ کے علم میں ہے خان صاحب حفاظتی ضمانت کے لیے کورٹ میں موجود ہیں، ایک وارنٹ رانا ثناءاللہ کو جاری ہوا اس پر کسی نے عمل نہیں کیا۔

انہوں نے کہا کہ ہمارے لوگوں پر یہاں سیدھا ربڑ کی گولیاں چلائی، پی ڈی ایم نے بنیادی انسانی حقوق کو معطل کیا، یہ سب لندن پلان کا حصہ ہے۔

فرخ حبیب نے یہ بھی کہا کہ مفرور باب کی بیٹی نے آج شکست تسلیم کرلی ہے ، مریم نواز عوام کے ووٹ کی دہشت سے خوفزدہ ہوگئیں ہیں، یہ لندن پلان جب بنا تو کون کون سی ضمانتیں لی ہیں عوام کو سب پتا لگ چکا ہے۔

ان کا کہنا تھا کہ مریم نواز کس حیثیت سے اداروں کو حکم دے رہی تھی کہ تحریک انصاف پر پابندی لگا دی جائے، پنچاب اور کے پی میں الیکشن ہونے جارہے ہیں عوام اپنے ووٹ سے پی ڈی ایم پر پابندی لگائے گی۔

فرخ حبیب کا یہ بھی کہنا تھا کہ پچھلے مہینے 28 اشیاء خوردونوش مہنگی ہوئی ہیں، مہنگائی آج 45 فیصد پر پہنچ گئی ہے، ستر سال کے مہنگائی کے ریکارڈ ٹوٹ گئے ہیں۔

 انہوں نے کہا کہ عمران خان پر 85 جعلی مقدمات بنائے گئے ہیں، عمران خان سانس لیتے ہیں آپ مقدمہ بنا دیتے ہیں، لندن میں نواز شریف کو لسی اور پائے نا ملے اس کا مقدمہ بھی عمران خان پر نا بنا دیں۔

پاکستان تحریک انصاف کے رہنما فرخ حبیب نے مزید کہا کہ مریم نواز خود نیب کے دفتر پر حملہ اور ہوگئی تھی، مریم نواز سے ریاست پاکستان کو خطرہ ہے لیکن اب ان کا مقابلہ عمران خان سے ہے۔