بھارتی پولیس کی خالصتان تحریک کے رہنما امرت پال سنگھ کی گرفتاری پر سکھ تنظیموں نے شدید احتجاج کیا ہے۔

تفصیلات کے مطابق بھارتی ریاست پنجاب میں پولیس نے خالصتان تحریک کے رہنما امرت پال سنگھ کو گزشتہ روز ان کے ساتھیوں سمیت گرفتار کر لیا تھا۔

بھارتی میڈیا کی رپورٹس کے مطابق ’وارث پنجاب دے‘ نامی تنظیم کے سربراہ اور خالصتان تحریک کے حامی امرت پال سنگھ کو گزشتہ روز جالندھر کے علاقے نکودر کے قریب پولیس نے گرفتار کر کے نامعلوم مقام پر منتقل کر دیا ہے۔

بھارت کی بی جے پی سرکار نے امرت پال سنگھ کی گرفتاری کے خلاف سکھوں کے ممکنہ شدید ردعمل کے باعث پنجاب میں انٹرنیٹ سروس بند کر دی ہے، اور بھاری تعداد میں پولیس کو تعینات کر دیا ہے، بھارتی پنجاب میں کرفیو کا ماحول ہے اور حالات کشیدہ ہیں۔

امرت پال سنگھ کی گرفتاری پر سکھ فیڈریشن یوکے سمیت متعدد بین الاقوامی سکھ تنظیموں نے مذمت کی اور اسے انسانی حقوق کی سنگین خلاف ورزی قرار دیا ہے۔

سکھ رہنما امرت پال سنگھ کی شعلہ بیاں تقریروں نے سکھوں میں ایک نئی روح پھونک دی ہے، چند روز قبل ہزاروں سکھوں نے ایک پولیس اسٹیشن پر دھاوا بول کر امرت پال سنگھ کے گرفتار ساتھی کو رہا کرا لیا تھا۔

بھارت سے موصولہ تفصیلات کے مطابق بھارتی حکومت امرت پال سنگھ کو گرفتار کرنے کا فیصلہ پہلے ہی کر چکی تھی، لیکن مودی سرکار جی 20 عالمی سربراہی کانفرنس کی وجہ سے امرت پال سنگھ کو گرفتار کرنے سے کترا رہی تھی.

مودی سرکار اس بات سے آگاہ تھی کہ اگر انہوں نے سکھ رہنما کو گرفتار کیا تو اس کا ردعمل شدید ہو سکتا ہے، اور سکھ برادری بھارت سمیت دنیا کے بھر کے مختلف ممالک میں بی جے پی سرکار کو ذلیل و رسوا کرنے میں کوئی کسر نہیں چھوڑیں گے۔

 سکھ رہنما امرت پال سنگھ کی گرفتاری کے بعد سکھوں کے ردعمل سے خوفزدہ بھارتی حکومت نے پنجاب بھر میں انٹرنیٹ سروس بند کر دی ہے اور پنجاب کے تمام اہم شہروں میں بھاری تعداد میں پولیس کو تعینات کر دیا ہے۔

بھارتی پنجاب کے مختلف علاقوں میں حالات کشیدہ ہیں، اور پوری ریاست کرفیو کے ماحول میں ہے، دوسری جانب بھارتی پولیس امرت پال سنگھ کے دیگر قریبی ساتھیوں اور اس کی تنظیم کے ٹھکانوں کے خلاف آپریشن کر رہی ہے۔