اے ٹی سی لاہور نے ڈاکٹر یاسمین راشد سمیت تین پی ٹی آئی رہنماؤں کی عبوری ضمانت منظورکرلی۔

تفصیلات کے مطابق لاہور کی انسداد دہشت گردی کی عدالت میں جلاؤ گھیراؤ اور پولیس پر تشدد، پتھراؤ اور پیٹرول بم پھینکنے اور پولیس کی گاڑیوں کا جلانے کے معاملے میں سماعت ہوئی۔

اے ٹی سی نے ڈاکٹر یاسمین راشد سمیت تین پی ٹی آئی رہنماؤں کی عبوری ضمانت منظورکرتے ہوئے 28 مارچ تک گرفتاری سے روک دیا۔

تحریکِ انصاف کے رہنماؤں ڈاکٹریاسمین راشد، میاں اسلم اقبال اور عاصم زمان خان نے عبوری ضمانت کی درخواست دائر کی۔ عدالت نے ملزمان کو ایک ایک لاکھ کے ضمانتی مچلکے جمع کرانے کا حکم دیا۔

انسداد دہشت گردی عدالت کی ایڈمن جج عبہر گل خان نے سماعت کی جبکہ ملزمان کی جانب سے رانا مدثرعمر ایڈووکیٹ نے دلائل دیے۔

درخواست گزاروں نے عدالت سے استدعا کی کہ شامل تفتیش ہونا چاہتے ہیں گرفتاری کا ڈرہے عبوری ضمانت منظورکی جائے۔

دوسری جانب انسداد دہشت گردی عدالت لاہورمیں کنال روڑ پر جلاؤ گھیراؤ، پولیس پرتشدد ، پولیس گاڑیوں کو جلانے اور پیٹرول بم چلانے سے متعلق کیس میں عدالت نے نئے گرفتار 97 ملزمان کو چودہ روزہ جوڈیشل ریمانڈ پر جیل بھجوا دیا۔

اے ٹی سی نے ملزمان کو شناخت پریڈ کیلئے جوڈیشل ریمانڈ پر جیل بھجوایا دیا۔ پولیس نے نئے گرفتار پی ٹی آئی کارکنان کو انسداد دہشت گردی عدالت میں پیش کیا۔

تفتیشی افسر نے ملزمان کو شناخت پریڈ کیلئے جیل بھجوانے کی استدعا کی، کہا کہ ملزمان نے کنال روڑ پر پولیس پر تشدد کیا اور گاڑیوں کو چلایا اور پیٹرول بم پھینکے۔

انسداد دہشت گردی عدالت کی ایڈمن جناب عبہر گل خان نے سماعت کی، انسداد دہشت گردی عدالت کے باہر سیکیورٹی کے سخت انتظامات کیے گئے اورپولیس کی اضافی نفری تعینات تھی۔