وزیر اعظم شہباز شریف نے رمضان المبارک میں اوقات سحر وافطار کے دوران بجلی کی بلا تعطل فراہمی کی ہدایت کردی ہے۔

تفصیلات کے مطابق وزارت توانائی کی جانب سے سحر افطار و تراویح کے اوقات میں لوڈ شیڈنگ نہ کرنے کا فیصلہ کیا گیا ہے۔

وزارت توانائی نے ملک کی تمام بجلی کی تقسیم کار کمپنیوں کو ہدایات جاری کرتے ہوئے کہا کہ سحر افطار و تراویح کے اوقات میں بجلی کی فراہمی یقینی ہوگی۔

وزارت توانائی نے کہا کہ سحر کے اوقات سے ایک گھنٹہ قبل اور ایک گھنٹہ بعد میں زیرو لوڈ منیجمنٹ ہوگی جبکہ افطار کے اوقات میں ایک گھنٹہ قبل اور تین گھنٹے بعد زیرو لوڈ منیجمنٹ ہوگی ۔

وزارت توانائی کا کہنا ہے کہ بجلی کی بلا تعطل فراہمی کیلئے آپریشن سرکل کی سطح پر کنٹرول روم قائم ہوں گے جبکہ ٹرانسفارمرز خرابی کی صورت میں اضافی ٹرانسفارمر اور ٹرالیاں دستیاب ہوں گی ۔

وزارت توانائی نے مزید بتایا کہ ڈویژن اور سب ڈویژن کی سطح پر شکایات کے ازالے کیلئے خصوصی ٹیمیں تشکیل دے دی گئی ہیں۔

واضح رہے کہ مولانا سید عبد الخبیر آزاد کی زیر صدارت پشاور میں مرکزی رویت ہلال کمیٹی کا اجلاس آج شام اوقاف ہال میں ہوگا جس میں ماہ رمضان کے چاند کی رویت کا فیصلہ اور اعلان کیا جائے گا ۔

اجلاس میں مركزی و زونل ممبران وزارت مذہبی امور ودیگر اداروں کے نمائندے شریک ہوں گے۔

بعدازاں غیر سرکاری رویت ہلال کمیٹی کا ایک اور اجلاس آج مسجد قاسم علی خان میں ہوگا جس کی صدارت مفتی شہاب الدین پوپلزئی کریں گے ۔