امریکی سفیر ڈونلڈ بلوم کا کہنا ہے کہ آئی ایم ایف پروگرام کے لیے پاکستانی اقدامات کی حمایت کرتے ہیں۔

تفصیلات کے مطابق امریکہ پاکستان کے مابین کسانوں کے لیے کھاد کے بہتر اور موثراستعمال  سے متعلق پروگرام کا آغاز کر دیا گیا۔ امریکی سفیر ڈونلڈ بلوم نے چار سالہ منصوبہ “فرٹیلائیزر رائٹ ” کا اجرا کر دیا۔

امریکہ  پاکستانی کاشتکاروں کو کھاد کے موثر استعمال کی تربیت پر 45 لاکھ ڈالر خرچ کریگا، منصوبہ کھاد کی فراہمی پر دباو کو کم کرنے میں مدد گار ہو گا ، کم کھاد کے استعمال سے نائٹرس آکسائیڈ کا کم اخراج ممکن ہو سکے گا۔

امریکی سفیر ڈونلڈ بلوم کا زرعی تحقیقاتی کونسل میں خطاب کے دوران کہنا تھا کہ پاکستان اور امریکہ کے درمیان زراعت پر تکنیکی تعاون 1960 میں شروع ہوا، فوڈ سیکورٹی کے لیے پاکستان کے ساتھ تعاون کر رہے ہیں، روس یوکرائن کراسسز کے باعث کھاد کی قیمتیں بڑھی۔ گزشتہ 18 ماہ سے پاکستانی کسان کو مشکلات کا سامنا رہا۔

امریکی سفیر کا کہنا تھا کہ کاشتکاروں کو بہتر انداز میں کھاد کے استعمال کی تربیت فراہم کرنا ہے، منصوبے کا مقصد کم کھاد سے زیادہ پیدوار کو ممکن بنانا ہے، پاکستان ان ممالک میں شامل ہے جن کو منصوبے کے تحت پہلے امداد ملی ہے، زراعت پاکستان میں معاشی ترقی کے لئے بہت اہم ہے۔

انہوں نے کہا کہ امریکہ سے پاکستان آنے والی سویابین فیڈ مکمل محفوظ ہیں۔یہ سویابین فیڈ امریکہ میں استعمال ہو رہی ہے، امید ہے سویابین فیڈ کا معاملہ حل ہوگا، سویابین فیڈ کے معاملے کچھ لائسنس و قانونی پیچیدگیاں ہیں جلد حل ہو جائیں گی۔

امریکی سفیر کا کہنا تھا کہ آئی ایم ایف پروگرام کے لیے پاکستانی اقدامات کی حمایت کرتے ہیں ، چاہتے ہیں پاکستان اور آئی ایم ایف ڈیل ہو جائے، آئی ایم ایف معاہدے کے حوالے سے پاکستان کی مکمل حمایت کرتے ہیں ،

ان کا مزید کہنا تھا کہ پاکستان کو دہشت گردی کے خطرات کا سامنا ہے، امریکہ پاکستان کی مدد کے لیے مکمل تیار ہے، پاکستان اور امریکہ کے درمیان سفارتی تعلقات میں بہت پیش رفت ہوئی ہے، کل پاکستان اور امریکہ کے درمیان انرجی ڈائیلاگ ہونے جارہے ہیں، جمعرات کو پاکستان اور امریکہ کے درمیان موسمیات پر مذاکرات ہیں۔