بابر اعوان نے کہا ہے کہ پنجاب اور کے پی کے کا الیکشن پی ٹی آئی ہی جیتے گی۔

تفصیلات کے مطابق پاکستان تحریک انصاف کے رہنما بابر اعوان نے میڈیا سے گفتگو کرتے ہوئے کہا کہ یہ لوگ عمران خان سے خوفزدہ ہیں، آئی جی پنجاب اپنے آپ کو ڈاکٹر کہتے ہیں لیکن انسانیت کا زرہ بھی نہیں ان میں، حکمران الیکشن کرانے پر مجبور ہو جائیں گے ہر صورت الیکشن ہونگے۔

بابر اعوان نے کہا کہ اعلیٰ عدلیہ قانونی و آئین کی بالادستی قائم رکھے ہوئے ہیں، آئندہ سال فروری میں سینٹ کے الیکشن ہونے ہیں جس کے لیے پورے ملک کی نمائندگی ضروری ہے۔

انہوں نے یہ بھی کہا کہ تمام قومی ادارے بشمول الیکشن کمیشن کوئی بھی الیکشن نہیں روک سکتا جبکہ اب نواز شریف کے پلیٹ لیٹس بھی نہیں گر رہے لیکن وہ پھر بھی پاکستان واپس نہیں آئیں ، انہیں ہم اور پاکستان کی عوام ہی واپس لائیں گے۔

ان کا کہنا تھا کہ مریم نواز کی جلسیاں اور ہمارے جلسے انہیں سونے نہیں دیتے، نواز شریف کو ملک سے جانے میں مدد دینے والوں نے جو غلطی کرائی آئندہ نہیں دھرائیں گے۔

بابر اعوان کا یہ بھی کہنا تھا کہ یہ خود باہر نکلنے سے ڈرتے ہیں اور عمران خان کو روک لیتے ہیں، پنجاب اور کے پی کے کا الیکشن پی ٹی آئی کا ہے انشاء اللہ جیتیں گے۔

پاکستان تحریک انصاف کے رہنما بابر اعوان کا مزید کہنا تھا کہ آئندہ این آر او نہیں لینے دینگے ابھی بھی ہماری لڑائی این آر او پلس روکنے کے لیے ہے۔