بلاول نے کہا ہے کہ اسلامو فوبیا کا وائرس بہت تیزی سے پھیل رہا ہے۔

وزیر خارجہ بلاول بھٹو نے اقوام متحدہ کی جنرل اسمبلی ہال میں اسلامو فوبیا کے حوالے سے خطاب کرتے ہوئے کہا کہ یہ اجلاس جنرل اسمبلی کے صدر کے دفتر اور پاکستان نے اسلامی تعاون تنظیم کی وزرائے خارجہ کونسل کے سربراہ کی حیثیت سے مشترکہ طور پر بلایا ہے ، گزشتہ سال 193 رکنی اسمبلی نے قرارداد 76/254 منظور کی جس میں 15 مارچ کو اسلامو فوبیا سے نمٹنے کا عالمی دن قرار دیا گیا۔

انہوں نے کہا کہ اجلاس میں اسمبلی کے صدر کاسابا کوروسی کے علاوہ اقوام متحدہ کے سیکرٹری جنرل انتونیو گوتریس اور اقوام متحدہ کے اتحاد برائے تہذیب کے اعلیٰ نمائندے میگوئل موراتینوس بھی موجود تھے، او آئی سی کے سیکرٹری جنرل حسین براہیم اور اقوام متحدہ کی خصوصی نمائندہ برائے آزادی مذہب نازیلا ثنا، ویڈیو لنک کے ذریعے خطاب کریں گی۔

وزیر خارجہ نے یہ بھی کہا کہ اپنے ابتدائی کلمات میں بلاول بھٹو نے کہا کہ 9/11 کے بعد سے، پوری دنیا میں مسلمانوں اور اسلام کے خلاف دشمنی اور ادارہ جاتی شکوک و شبہات “وبائی تناسب” سے بڑھے ہیں، اس کے برعکس احتجاج کے باوجود ؛ اسلام اور مسلمان معمول کے مطابق دہشت گردی سے جڑا جا رہا ہے۔

بلاول بھٹو نے اقوام متحدہ کے زیر اتمام کانفرنس میں اسلامو فوبیا کے بڑھتے ہوئے رجحان کے خلاف لڑنے کے لیے عالمی اتحاد پر زور دیا جبکہ بلاول بھٹو نے مختلف مذاہب اور مسالک سے تعلق رکھنے والوں سے مطالبہ کیا کہ وہ نفرت، تعصب اور عدم برداشت کے خلاف جنگ میں ساتھ کھڑے ہوں۔

ان کا کہنا تھا کہ اس دن کے منانے سے اسلامو فوبیا کے مکروہ رجحان کے بارے میں بیداری پیدا کرنے ، باہمی احترام اور افہام و تفہیم کو آگے بڑھانے مدد ملے گی، یہ دن اسلامو فوبیا کے عصری طاعون کے خاتمے کے لیے ٹھوس اقدامات کرنے کے لیے ہمارے مشترکہ عزم کو تقویت دینے کا باعث بنے گا اور اس دن کو منانے سے اس بات کو اجاگر کرنے میں مدد ملے گی کہ اسلام اعتدال، رواداری اور تکثیریت کا مذہب ہے۔

بلاول بھٹو کا یہ بھی کہنا تھا کہ کچھ معاملات میں نفرت اور تشدد پر اکسانے کی بیان بازی کی سرکاری سطح پر سرپرستی کی گئی، مسلم عوام کے حق خود ارادیت سے انکار کرنے والوں کی پالیسیاں اور پرتشدد اقدامات آج اسلامو فوبیا کے بدترین مظہر کی نمائندگی کرتے ہیں۔

انھوں نے اقوام متحدہ کے سیکرٹری جنرل پر زور دیا کہ وہ او آئی سی ممالک کے ساتھ مل کر اسلامو فوبیا کو روکنے اور اس کے خاتمے کے لیے ایک ایکشن پلان تشکیل دیں، ایکشن پلان میں اسلامو فوبیا سے نمٹنے کے لیے اقوام متحدہ کے خصوصی ایلچی کی تقرری مقدس مقامات کی حفاظت کے لیے اقدامات کو اپنایا جا سکتا ہے۔

وزیر خارجہ نے کہا کہ نفرت انگیز تقاریر، قرآن پاک کی بے حرمتی اور مسلمانوں اور دیگر کمیونٹیز کے خلاف امتیازی سلوک اور تشدد کو غیر قانونی بنانے کے لیے قومی اور بین الاقوامی سطح پر قوانین کو اپنایا جا سکتا ہے۔

بلاول بھٹو نے یہ بھی کہا کہ اسلامو فوبک اعمال کا نشانہ بننے والوں کو قانونی مدد اور مناسب معاوضے کی فراہمی کو شامل کیا جا سکتا ہے، اسلامو فوبیا کی کارروائیوں کے ذمہ داروں کو جوابدہ ٹھہرانے کے لیے قومی اور بین الاقوامی عدالتی میکانزم اور قوانین کا قیام کو بھی ایکشن پلان کا حصہ بنایا جا سکتا ہے۔

ان کا کہنا تھا کہ اسلامو فوبیا کا وائرس اس سے زیادہ تیزی سے پھیل رہا ہے جتنا ہم رد عمل ظاہر کرنے کے قابل ہیں،بڑی بڑی جمہوریتیں بھی استثنیٰ نہیں رکھتیں۔ ہم نے جمہوری معاشروں میں مسلمانوں پر پابندیوں کو بے نقاب کرتے دیکھا ہے۔

بلاول کا یہ بھی کہنا تھا کہ نام نہاد آزاد معاشرے مقدس مقامات کی بے حرمتی کی صوابدید کی اجازت دیتے ہیں، آج ہمیں ایک جامع معاشرے کی تعمیر کے لیے اپنے عزم کی تجدید کرنی چاہیے جہاں مختلف ثقافتوں اور عقائد کے تنوع کو اپنایا جائے۔

وزیر خارجہ نے کہا کہ جنرل اسمبلی کی جانب سے 15 مارچ کو اسلامو فوبیا سے نمٹنے کے لیے عالمی دن کے طور پر منانے کا اعلان اسلامو فوبیا کے معلوم اور نامعلوم دونوں متاثرین کے ساتھ عالمی یکجہتی کا مظہر ہے۔

بلاول بھٹو نے کہا کہ پیغمبر اسلام نے مسلمانوں کو نسل، ثقافت، جنس یا مذہب سے قطع نظر ہر ایک کے ساتھ عزت اور احترام کے ساتھ پیش آنا سکھایا ہے، اسلام اور اس کے ماننے والوں خلاف بے بنیاد تعصب ایک افسوسناک حقیقت ہے جس کی جڑیں گہری اور اس سے نمٹنے کا چیلنج اس سے کہیں زیادہ گہرا ہے۔

انھوں نے یہ بھی کہا کہ نوآبادیاتی دور سے، مسلمانوں اور ان کے عقائد کو ثقافتی “دوسروں” اور “خطرات” کے طور پر پیش کرنے والے تصورات نے اسلامو فوبیا اور مسلم مخالف نفرت کو برقرار رکھنے، توثیق کرنے اور معمول پر لانے کا کام کیا ہے۔

ان کا کہنا تھا کہ یہ اسلامو فوبک بیانیہ صرف انتہاپسندوں کے معمولی پروپیگنڈے تک ہی محدود نہیں ہے بلکہ افسوس کی بات ہے کہ اسے مرکزی دھارے کے میڈیا، تعلیمی اداروں، پالیسی سازوں اور ریاستی مشینری کے سیکشن نے بھی قبول کیا ہے، اس لیے اسلامو فوبیا کو مسلسل ڈھانچہ جاتی تفریق، زینو فوبیا، اور مسلمانوں اور ان کے عقیدے کے بارے میں منفی دقیانوسی تصورات کو ہوا دی جا رہی ہے۔

وزیر خارجہ بلاول بھٹو کا مزید کہنا تھا کہ ہمیں ایسے جامع معاشروں کی تعمیر کے لیے اپنے عزم کی تجدید کرنی چاہیے جہاں مختلف ثقافتوں اور عقائد کو منایا جائے اور تنوع کو اپنایا جائے، ہم خطرناک نظریات اور انسانیت کے طور پر ہمیں تقسیم کرنے والے اعمال کو نظر انداز کرنے کے متحمل نہیں ہوسکتے ہیں۔