قطر میں ہونے والی لیجنڈز لیگ 2023 میں ایشیا لائنز نے ورلڈ جائنٹس کی ٹیم کو باآسانی زیر کر لیا۔

تفصیلات کے مطابق قطر کے دارالحکومت دوحا میں لیجنڈز لیگ 2023 کے میچ میں شاہد خان آفریدی کی قیادت میں ایشیا لائنز نے ورلڈ جائنٹس کی ٹیم کو 35 رنز سے شکست دے دی۔

لیجنڈز لیگ 2023 میں ایشیا لائنز دو فتوحات کے ساتھ پوائنٹس ٹیبل پر سرفہرست ہے۔

بارش کی وجہ سے میچ دو گھنٹے تاخیر سے شروع ہوا، امپائر نے میچ کو فی ٹیم 10 اوورز تک محدود کر دیا۔

ایشیا لائنز کے اوپنر سری لنکن بیٹنگ جوڑی اپل تھرنگا اور تلکارتنے دلشان جلد ہی اپنی وکٹ گنوا بیٹھے، لائنز کی اننگ کی پہلی باؤنڈری تیسرے اوور کی آخری گیند پر آئی۔

تھیشارا پریرا اور کپتان شاہد خان آفریدی بھی وکٹ پر زیادہ دیر رک نہ سکے، مصباالحق نے ایک اینڈ سنبھالے رکھا، انہوں نے 19 گیندوں پر 44 رنز بنائے.

ایشیا لائینز نے مقررہ 10 اوورز میں 3 وکٹوں کے نقصان پر 99 رنز بنائے۔

ہدف کے تعاقب کے لیے ورلڈ جائنٹس کے کپتان ایرون فنچ نے اپنے سب سے بڑے ہتھیار کرس گیل لینڈل سیمنز کو بھیجا مگر وہ ان کی امیدوں پر پورا نہ اتر سکے۔

بنگلہ دیش کے سابق اسپنر رزاق نے بنا کوئی رن دیئے 8 ویں اوور میں شین واٹسن اور ریکارڈو پاول کی وکٹیں حاصل کی، جو ورلڈ جائنٹس کے تابوت میں آخری کیل ثابت ہوا.

ورلڈ جائنٹس کی ٹیم مقررہ 10 اوورز میں 5 وکٹوں کے نقصان پر 64 رنز بنا سکی، ایشیا لائینز نے یہ میچ 35 رنز سے جیت لیا۔