سعودی عرب کے شہزادہ اور سعودی سفیر نے لاہور میں ٹیک ہاؤس کا افتتاح کر دیا جو پاک سعودی عرب ڈیجیٹل تعلقات کا مظہر ہے۔

تفصیلات کے مطابق لاہور میں سعودی شہزادہ فہد بن منصور السعود اور سعودی سفیر نے پاک ٹیک ہاؤس کا افتتاح کر دیا، اس ٹیک ہاؤس کے افتتاح سے پاک سعودی عرب ڈیجیٹل تعلقات نے اہم سنگ میل عبور کر لیا ہے۔

پاکستان میں ٹیک ہاؤس کے قیام سے ایک ہزار روزگار کے بہترین مواقع میسر آئیں گے جس سے پاکستان میں 100 ملین ڈالرز کی لاگت سے 5 سالوں میں 300 منصوبے شروع کئے جائیں گے۔

پاکستان میں ٹیکنالوجی کے شعبے میں سعودی عرب کی سرمایہ کاری کا باقاعدہ افتتاح کر دیا گیا اور پہلے مرحلے میں لاہور میں ٹیک ہاوس بنایا جائے گا.

اس حوالے سے سعودی ٹیکنالوجی کمپنی کے سربراہ شہزادہ فہد بن منصور السعود نے مستقبل میں بڑی سرمایہ کاری کا اعلان کر دیا ہے، جس کے تحت سعودی، پاکستان ٹیک ہاؤس کی پہلی شاخ لاہور میں تشکیل پائے گی۔

شہزادہ فہد بن منصور السعود کا کہنا تھا کہ ہم سعودی ولی عہد شہزادہ محمد بن سلمان کے وژن 2030ء کے تحت آگے بڑھ رہے ہیں اس سے سعودی عرب کی ڈیجیٹل اور انفارمیشن ٹیکنالوجی کے ترقیاتی وژن سے لاتعداد مواقع پیدا ہوں گے۔

شہزادہ فہد بن منصور السعود نے کہا کہ پاکستان میں ٹیک ہاؤس کے قیام سے ایک ہزار روزگار کے بہترین مواقع میسر آئیں گے اور پاکستان میں 100 ملین ڈالر کی لاگت سے 5 سالوں میں 300 منصوبے شروع کریں گے۔

تقریب سے خطاب کرتے ہوئے،سعودی سفیر سعید بن نواف المالکی نے کہا ٹیک ہاوس کا قیام سعودی ولی عہد محمد بن سلمان کے وژن 2030 کی پہلی کڑی ہے.

سعودی سفیر نے کہا کہ یہ پروگرام سعودی ولی عہد کا وژن 2030 کے تحت ٹیکنالوجی سے استفادہ حاصل کرنے کا پروگرام ہے اور سعودی پاک ٹیک ہاؤس اسی سلسلے کی ایک کڑی ہے.

سعودی سفیر سعید بن نواف المالکی کے مطابق آئی ٹی کے استعمال سے دونوں ممالک کو مختلف شعبوں میں اپنے تعلقات مزید مضبوط کرنے میں مدد ملے گی۔

سعودی سفیر نے مزید کہا کہ پاکستان سعودی عرب کا برادر اسلامی ملک ہے اور تعلقات کے قیام سے آج تک دونوں ممالک کے مضبوط تعلقات رہے ہیں۔

اس موقع پر پاکستان کے وزیر اعظم کی معاون خصوصی شیزاہ فاطمہ نے کہا کہ سعودی عرب تیزی سے جدت کی طرف گامزن ھے اور مستقبل میں سعودی عرب ٹیکنالوجی کا مرکز ھوگا۔

وزیر اعظم کی معاون خصوصی کا مزید کہنا تھا کہ پاکستان کی 70 فیصد آبادی 30 سال سے کم عمر ہے اور پاکستان کے انسانی وسائل کا بیشتر حصہ نوجوان ہیں، جو حقیقی ترقی کے ضامن ہیں.

معاون خصوصی کے مطابق زرعی اور دیگر کاروبار کے لیے 15 لاکھ روپے تک آسان اور سود سے پاک قرضہ جات کی فراہمی کا سلسلہ شروع کیا ہے اور نوجوانوں کے لیے 15، 25 اور 75 لاکھ تک کے قرضہ جات کا اجراء کیا گیا ہے.

شیزاہ فاطمہ نے کہا کہ طلباء دوران تعلیم ہی قرضہ جات حاصل کرکے اپنا کاروبار شروع کر سکتے ہیں،ان کا مزید کہنا تھا کہ نوجوان اپنے ترقیاتی، تخلیقی خیالات کو حقیقی عملی امور میں بدل سکتے ہیں.

وزیر اعظم شہباز شریف کی معاون خصوصی شیزاہ فاطمہ نے کہا کہ نوجوانوں کی ہنرمند تربیت پر بھی توجہ دی جا رہی ہے اس کے لیے انفارمیشن ٹیکنالوجی سرفہرست ہے.

معاون خصوصی نے تعلیمی درسگاہوں اور صنعتی شعبے کے مابین ربط و تعلق قائم کرنے کے عزم کا اعادہ کیا اور کہا کہ پاکستان کے پاس قابل نوجوان آبادی کی صورت دنیا کو پیش کرنے کے لیے بہت کچھ ہے.