اسحاق ڈار نے کہا ہے کہ زراعت ملک کی ریڑھ کی ہڈی کی حیثیت رکھتی ہے۔

تفصیلات کے مطابق وزیر خزانہ اسحاق ڈار سے فوجی فرٹیلائزر بن قاسم لمیٹیڈ کے ایم ڈی عارف الرحمن کی ملاقات ہوئی جس میں معاونین خصوصی وزیر اعظم طارق باجوہ، طارق محمود پاشا اور دیگر سینئر افسران نے شرکت کی۔

ایم ڈی ایف ایف بی ایل کی کمپنی نے پروفائل اور قومی خزانے میں حصے پر بریفنگ دیتے ہوئے کہا کہ ایف ایف بی ایل بڑے پیمانے پر ڈی اے پی کی تیاری اور پاکستان میں پائیدار زرعی ترقی کے لیے کوشاں ہے۔

ایم ڈی نے وزیر خزانہ کو کمپنی کے مستقبل میں مائیکرو نیوٹرینٹ پروڈکٹس کی تیاری کے منصوبوں سے بھی آگاہ کیا اور کہا کہ منصوبے سے کھیتوں کو مزید ذرخیز اور پیداوار میں اضافہ ہو سکے گا۔

وزیر خزانہ اسحاق ڈار نے معیشت میں ایف ایف بی ایل کے تعاون کو سراہا جبکہ اسحاق ڈار نے زرعی شعبے اور ملک کی اقتصادی ترقی کے لیے فرٹیلائزر سیکٹر کی اہمیت پر بھی زور دیا۔

اسحاق ڈار نے فی ایکڑ پیداوار بڑھانے کے لیے ڈی اے پی پروڈکٹ پر ایف ایف بی ایل کی سرمایہ کاری کی تجاویز کی حمایت کی جبکہ وزیر خزانہ نے کمپنی کو اپنے مکمل تعاون کا یقین دلایا۔

وزیر خزانہ اسحاق ڈار نے مزید کہا کہ زراعت ملک کی ریڑھ کی ہڈی کی حیثیت رکھتی ہے، حکومت کسانوں کو زیادہ سے زیادہ سہولیات فراہم کرنے کی خواہاں ہے تاکہ کاشتکاری کی لاگت کم ہو اور پیداوار میں اضافہ ہو سکے۔