پاکستان کرکٹ بورڈ کی جانب سے  25 ہزار ڈالر کی شرط کھلاڑیوں کو کو ریٹائرمنٹ پر مجبور کررہی ہے۔ 

گزشتہ روز پاکستان کرکٹ بورڈ کی جانب سے  فاسٹ بولر احسان عادل اور آل راؤنڈر حماد اعظم کی ریٹائرمنٹ کا اعلان کیا گیا تھا، بورڈ نے دونوں کرکٹرز کو ان کی کرکٹ میں خدمات پر مبارک باد دیتے ہوئے مستقبل میں ان کے لیے نیک تمناؤں کا اظہار کیا ہے۔

تاہم اب یہ خبر سامنے آئی ہے کہ امریکی لیگ کے این او سی کے لیے پی سی بی کی جانب سے 25 ہزار ڈالر کی شرط ان کھلاڑیوں کو ریٹائرمنٹ کا فیصلہ لینے پر مجبور کررہی ہے۔

فاسٹ بولر احسان عادل اور حماد اعظم کے بعد آنے والے دونوں میں مزید کھلاڑیوں کی جانب سے انٹرنیشنل کرکٹ کو خیرباد کہے جانے کا امکان ہے۔

یہ بھی پڑھیں: پاکستان کے دو اہم فاسٹ بولرز نے ریٹائرمنٹ کا اعلان کردیا!

ذرائع کا کہنا ہے کہ سمیع اسلم کا تجربہ کامیاب ہونے کے بعد کئی کھلاڑی مستقل طور پر امریکہ میں مقیم ہونے کی بھی کوشش کررہے ہیں۔

حال ہی میں ریٹائرمنٹ لینے والے احسان عادل نے فروری 2013ء میں جنوبی افریقا کے خلاف سنچورین میں اپنے ٹیسٹ کریئر کا آغاز کیا تھا اس کے بعد وہ مزید 2 ٹیسٹ میچز کھیلے۔ انہوں نے 3 ٹیسٹ میچوں میں 5 وکٹیں حاصل کیں جب کہ 6 ون ڈے انٹرنیشنل میچز میں 4 وکٹیں حاصل کرنے میں کامیاب رہے۔

احسان عادل نے انٹرنیشنل کرکٹ میں آنے سے قبل 2012ء میں آسٹریلیا میں منعقدہ آئی سی سی انڈر19 ورلڈ کپ میں بھی پاکستان کی نمائندگی کی تھی۔

آل راؤنڈر حماد اعظم نے 2011 سے 2015 تک کے عرصے میں 11 ون ڈے انٹرنیشنل کھیلے جن میں 80 رنز بنانے کے علاوہ دو وکٹیں حاصل کیں جب کہ 5 ٹی ٹوئنٹی انٹرنیشنل میچوں میں وہ 34 رنز بنانے میں کامیاب ہوسکے۔