سماعت کے دوران عدالت نے استفسارکیا کہ بتایا جائے کہ صوبے بھرمیں کتنی گاڑیاں محکموں اور افسران کے پاس ہیں؟

لاہور ہائیکورٹ میں پنجاب بھر کے اسسٹنٹ کمشنرز سمیت ضلعی افسران کیلئے نئی گاڑیاں خریدنے کےخلاف کیس کی سماعت ہوئی۔

عدالت نے حکومت پنجاب کونوٹس جاری کرتے ہوئے دس روز میں تفصیلی رپورٹ طلب کرتے ہوئے حکم دیا کہ بتایا جائے کہ صوبے بھر میں کتنی گاڑیاں محکموں اور افسران کے پاس ہیں؟

عدالت نے سماعت کے دوران ریمارکس دیے کہ اگرعدالت جواب سے مطمئن نہ ہوئی تو متعلقہ افسران کو طلب کرینگے، عدالتی اطمینان کے بعد مناسب حکم جاری کیا جائیگا۔

دورانِ سماعت سرکاری وکیل کی طرف سے درخواست کی مخالفت کی گئی، مؤقف پیش کیا کہ درخواست قابل سماعت نہیں ہے۔

جسٹس رسال حسن سید نے فرحت منظور چانڈیو ایڈووکیٹ کی درخواست پر سماعت کی۔

درخواست گزار نے مؤقف اپنایا کہ حال ہی میں آئی ایم ایف سے سخت شرائط پر حکومت نے قرض لیا،  سخت شرائط پر قرض کے بعد غریب عوام پر بھاری ٹیکسز عائد کردیے گئے، غریب عوام مہنگائی اور بھوک سے خود کشیاں کر رہی ہے۔

وکیل درخواست گزارنے مؤقف پیش کیا کہ پنجاب حکومت نے غریب عوام کو ریلیف دینے کی بجائے افسران کیلئے نئی گاڑیاں خریدنے کا فیصلہ کیا، صوبے بھر کے اسسٹنٹ کمشنرز، افسران اور محکموں کے پاس پہلے ہی بڑی تعداد میں گاڑیاں موجود ہیں۔ نگران حکومت نے اختیارات نہ ہونے کے باوجود اربوں روپے گاڑیوں کی خریداری کیلئے جاری کئے۔

وکیل درخواست گزارنے استدعا کی کہ عدالت اسسٹنٹ کمشنرز اور افسران کو گاڑیاں دینے کا نوٹیفکیشن کالعدم قرار دے، عدالت تمام محکموں اور افسران کے زیر استعمال گاڑیوں کی تفصیلات طلب کرے۔

اگر آپ حالاتِ حاضرہ سے باخبر رہنا چاہتے ہیں تو ہمارےفیس بک پیج https://www.facebook.com/BOLUrduNews/ کو لائک کریں

ٹوئٹر پر ہمیں فولو کریں https://twitter.com/bolnewsurdu01 اور حالات سے باخبر رہیں

پاکستان سمیت دنیا بھر سے خبریں دیکھنے کے لیے ہمارے  کو سبسکرائب کریں   اور بیل آئیکن پر کلک کریں۔