آسکر ایوارڈ یافتہ اداکار جیکی چن کی اپنی بیٹی کے ساتھ رونے کی ویڈیو سوشل میڈیا پر وائرل ہو گئی۔

ٹوئٹر پر شیئر ہونے والی 39 سیکنڈ کی اس ایڈیٹڈ ویڈیو میں جیکی چن بیٹی کے ساتھ اپنی پرانی فلموں کے ایسے خطرناک مناظر دیکھ رہے ہیں جو انہوں نے خود کیے تھے اور زخمی بھی ہوئے تھے۔

ایک منظر میں ان کو بس کے پیچھے بھاگتے اور پھر اس کو پکڑتے ہوئے دیکھا جا سکتا ہے جس میں وہ منہ کے بل گرتے ہیں اور پھر پیچھے سڑک پر گھسیٹے چلے جاتے ہیں۔

اس وقت بیٹی ان سے پوچھتی ہیں کہ ’اس وقت آپ کو چوٹ لگی تھی اور درد ہوا تھا؟‘

اس کے جواب میں جیکی چن بتاتے ہیں کہ ’بہت زیادہ‘۔

البتہ اگلے سین میں وہ ایک ڈبل ڈیکر بس کے اوپری حصے کے ساتھ لٹکتے ہوئے دکھائی دیتے ہیں جس پر ان کی بیٹی’پاپا یو آر آسم‘کہتی ہے۔

اس کے بعد کا چند سیکنڈ کا وقت بہت جذباتی ہے کیونکہ اس میں ان کی بیٹی کو آنسوؤں کے ساتھ روتے ہوئے دیکھا جا سکتا ہے جبکہ اس کے ساتھ ہی جیکی چن کی آنکھیں بھی چھلکنا شروع ہو جاتی ہیں۔

یہ ویڈیو سامنے آتے ہی صارفین نے تبصروں کا سلسلہ شروع کر دیا جن میں سے زیادہ تر باپ بیٹی کی محبت، کام سے لگن اور جذباتی قسم کے جملوں پر مشتمل ہیں۔

ایم ای بی نے تبصرے میں اپنے جذبات کا اظہار کچھ یوں کیا کہ ’میں ان سے محبت کرتا ہوں اور میں نہیں رو رہا۔

جیکی چن ہالی وڈ اور کئی ملکوں کی دیگر بے شمار فلموں میں کام کر چکے ہیں وہ کامیڈی کے علاوہ اپنی فلموں کے خطرناک سٹنٹس خود کرنے کے لیے مشہور ہیں۔

چین سے تعلق رکھنے والے جیکی چن کی پیدائش ہانگ کانگ میں 1954 میں ہوئی تھی ان کے والدین ان کی پیدائش سے قبل خانہ جنگی کے باعث وہاں منتقل ہو گئے تھے۔