بالی وڈ اداکارہ کاجول کے حالیہ انٹرویو کی ویڈیو سوشل میڈیا پر وائرل ہوگئی۔

وائرل ہونے والی ویڈیو میں اداکارہ کاجول کا کہنا ہے کہ وژن سے محروم غیر تعلیم یافتہ سیاسی رہنما ہم پر حکمرانی کر رہے ہیں۔

کاجول نے کہا کہ بھارت جیسے ملک میں تبدیلی بہت زیادہ سست روی کا شکار ہے۔

اداکارہ کا کہنا تھا کہ کیونکہ ہم اپنی رسومات میں اس قدر گِھرے ہوئے ہیں، ہم اپنے ہی سوچنے کے عمل میں کھوئے ہوئے ہیں اور یقیناً اس سب کا تعلق تعلیم سے ہے۔

کاجول نے کہا کہ ہمارے حکمران وہ ہیں جن کا کوئی علمی پس منظر نہیں ہے۔

بعد ازاں سوشل میڈیا سمیت مین اسٹریم میڈیا پر کاجول پر تنقید کی جا رہی ہے۔

تنقید کے جواب پر اداکارہ نے ٹوئٹر پر ایک مختصر وضاحتی بیان جاری کیا۔

I was merely making a point about education and its importance. My intention was not to demean any political leaders, we have some great leaders who are guiding the country on the right path.

— Kajol (@itsKajolD) July 8, 2023

انہوں نے کہا کہ میں صرف تعلیم اور اس کی اہمیت سے متعلق اپنا نکتہ نظر پیش کر رہی تھی۔

واضح رہے اداکارہ کاجول نے مزید کہا کہ میرا مقصد سیاسی رہنماؤں کو کمتر ثابت کرنا نہیں تھا، ہمارے یہاں کچھ عظیم رہنما بھی ہیں جو ملک کی درست سمت میں رہنمائی کر رہے ہیں۔