کھیرا ایک انتہائی صحت بخش سبزی ہے جو ساراسال آسانی دستیاب ہوتی ہے۔ اسے سلاد کا اہم ترین جز کہاجائے تو بے جانہ ہوگا۔ ویسے اسے ہر موسم کے لیے مفید تصور کیا جاتا ہے تاہم موسم گرما میں اس کی افادیت کہیں زیادہ بڑھ جاتی ہے۔

کھیرے میں 95 فیصد پانی ہوتا ہے۔ اگرغذائیت کے اعتبار سے بات کی جائے تو اس میں کیلوریز میں بہت کم ہوتی ہے جبکہ یہ وٹامن کے، پوٹاشیم اور میگنیشیم کی تھوڑی مقدار فراہم کرتا ہے۔

موسم گرما میں اس کا استعمال ایک جانب تو جسم کو ہائیڈریٹ رکھتا ہے، دوسری جانب یہ صحت کو بہتر بنانے میں بھی مددفراہم کرتا ہے۔ کھیرے کو چھلکوں سمیت کھانا زیادہ فائدہ مند ثابت ہوتا ہے کیو نکہ اس کے چھلکوں میں بھی کئی طرح کے وٹامنز اور منرلز موجود ہوتے ہیں۔

اسے سلاد کے علاوہ سینڈ وچ برگراور دہی میں ملا کر بھی استعمال کیاجاتا ہے جو ان کی غذائیت کے ساتھ ذائقہ کو بڑھا دیتا ہے۔

کھیرے میں موجود اینٹی آکسیڈینٹس اور ضروری غذائیت جہاں اسے ایک صحت بخش سبزی بناتی ہے وہی یہ جلد کی صحت کا بھی ضامن ہے۔

سورج کی تمازت کو کم کرنے میں کھیرے سے بہتر کوئی متبادل نہیں اسے متاثرہ جلد پر لگائیں یہ جلد کی سوجن کو کم کر کے آرام پہنچائے گا۔

کھیرا ہڈیوں کا بھی  محافظ ہے اس میں موجود وٹامن کے ہڈیوں میں کیلشیم کو بہتر طور پرجذب کرنے میں مددفراہم کرتا ہے۔