احسن اقبال نے کہا ہے کہ چیئرمین پی ٹی آئی اپنی سیاست کے نتیجے میں ایکسپوز ہو چکے ہیں۔

تفصیلات کے مطابق وفاقی وزیر پلاننگ اینڈ ڈیولپمنٹ احسن اقبال نے نارووال میں گفتگو کرتے ہوئے کہا کہ پاکستان کی بین الاقوامی ساکھ معاشی حلقوں میں ختم ہو چکی تھی، ہم نے پاکستان کو اس تباہی کے گڑے سے نکالا ہے جس میں خان صاحب پاکستان کو پھینک گئے تھے۔

  انہوں نے کہا کہ بڑی مشکل سے حکومت نے سخت فیصلے کئے عالمی مالیاتی حلقوں میں ساکھ کو بحال کیا ہے، چین کی طرف سے  2018 کے بعد پہلی بڑی سرمایہ کاری چشمہ فائو نیوکلیئر پاور پلانٹ میں  ساڑھے تین ارب ڈالر کی پاکستان آئی ہے۔

وفاقی وزیر نے یہ بھی کہا کہ ملک کو کسی قسم کی مہاز آرائی کی ضرورت نہیں ہے ملک کو یکجہتی کی ضرورت ہے، ملک کے سیاسی استحکام کو برقرار رکھا جائے۔

احسن اقبال کا کہنا تھا کہ چیئرمین پی ٹی آئی اپنی سیاست کے نتیجے میں ایکسپوز ہو چکے ہیں،9 مئی کا واقع قوم کے ذہنوں سے بھلایا نہیں جا سکتا۔

 ان کا یہ بھی کہنا تھا کہ نواز شریف صاحب آئے گے اور انتخابی مہم میں حصہ بھی لیں گے کیونکہ سب کو معلوم ہو گیا ان کو جھوٹے کیس میں نااہل کیا گیا، ایک مانیٹرنگ جج لگایا گیا کہ جس کی نگرانی میں  نیچے کی عدالتیں ان کے خلاف فیصلے دیں، وہ سازش کے تمام کردار اب خود گواہی دے چکے ہیں۔

وفاقی وزیر پلاننگ اینڈ ڈیولپمنٹ احسن اقبال کا مزید کہنا تھا کہ ہمارے اتحادی جماعتوں کے سربراہان آپس میں اتفاق رائے سے فیصلے کرتے آئے ہیں، اگلے الیکشن میں ہر جماعت اپنے پلیٹ فارم سے الیکشن لڑے گی۔