وزیراعلیٰ بلوچستان نے کہا ہے کہ گوادر کی ترقی پر پہلا حق مقامی لوگوں کا ہے جسے کسی صورت نظرانداز نہیں کیا جاسکتا۔

تفصیلات کے مطابق وزیراعلیٰ بلوچستان میرعبدالقدوس بزنجو کی زیر صدارت گوادر کے امور اور مسائل کے جائزہ کا اعلیٰ سطحی اجلاس ہوا جس میں سنٹرل بزنس ڈسٹرکٹ کے امور پر بریفنگ دی گئی جبکہ متعلقہ حکام نے اجلاس کو گوادر کے ترقیاتی امور اور مسائل پر بھی بریفنگ دی گئی۔

اجلاس میں فری ٹریڈ زون کے لیے حاصل کی گئی اراضی کے مالکان کے لئے کمپنسیشن میں اضافہ کی اصولی منظوری دی گئی جبکہ اجلاس میں پرانی آبادی کے 84 ماہی گیروں کے گھروں کی سیٹلمنٹ کی تصیح کی بھی منظوری دی گئی۔

اجلاس کی صدارت کرتے ہوئے وزیراعلیٰ بلوچستان میرعبدالقدوس بزنجو نے کہا کہ گوادر ماسٹر پلان کے تحت سینٹرل بزنس ڈسٹرکٹ میں کاروباری و تجارتی سرگرمیوں کے فروغ کے لیۓ سرمایہ کاروں کو راغب کرنے کی جامع پالیسی بنائی جائے جبکہ ہاؤسنگ کے شعبہ میں سرمایہ کاری کی حوصلہ افزائی کی جائے۔

میرعبدالقدوس بزنجو نے کہا کہ گوادر کی ترقی کے عمل کو تیز کرنے کے لیے مقامی آبادی کے حقوق اور اختیارات کا تحفظ یقینی بنانا ہوگا جبکہ مقامی لوگوں کو اعتماد میں لیکر ترقیاتی عمل میں شراکت دار بنایا جائے گا۔

انہوں نے یہ بھی کہا کہ گوادرکی ترقی پر پہلا حق مقامی لوگوں کا ہے جسے کسی صورت نظرانداز نہیں کیا جاسکتا، ہماری حکومت نے گوادر کو ٹیکس فری ڈسٹرکٹ کا اسٹیٹس دیا ہے۔

وزیراعلیٰ بلوچستان میرعبدالقدوس بزنجو نےمزید کہا کہ امید ہے کہ وفاقی حکومت بھی جلد وفاقی ٹیکسوں کی چھوٹ دیگی ، اس اقدام کا مقصد سرمایہ کاروں کی حوصلہ افزائی اور انکا اعتماد حاصل کرنا ہے۔

گوادر سے رکن صوبائی اسمبلی میر حمل کلمتی ،سینیٹر کہدہ بابر سینئر ممبر بورڈ آف ریونیو اجلاس میں شریک ہوئے جبکہ سیکریٹری بلدیات ،سیکریٹری مواصلات، سیکریٹری پی ایچ ای چئیرمین گوادر پورٹ اتھارٹی ,ڈی جی جی ڈی اے کمشنر مکران ڈی سی گوادر نے بھی اجلاس میں شرکت کی۔