وزیر داخلہ نے کہا ہے کہ دہشت گردی کے خلاف جنگ دہشت گردوں کے خاتمہ تک جاری رہے گی۔

تفصیلات کے مطابق اپنے ایک بیان میں وفاقی وزیر داخلہ رانا ثناءاللہ خان نے میران شاہ شمالی وزیرستان میں خوکش دھماکہ کی شدید مذمت کی ہے۔

رانا ثناءاللہ نے کہا کہ سیکورٹی فورسز کے جوانوں نے جانوں کی قربانی دیکر بڑی تباہی کا راستہ روک دیا، سیکورٹی فورسز کے 3 جوانوں کی شہادت ایک بڑا سانحہ ہے۔

انہوں نے یہ بھی کہا کہ ہمارے جوان اور شہری دہشت گردی کے خلاف ایک تاریخ رقم کررہے ہیں، ایسی قربانیاں ہمارے عزم کو مذید جلا بخشتی ہیں۔

ان کا کہنا تھا کہ زخمی ہونے والے 3 شہری بھی ہمارے قومی ہیرو ہیں، دہشت گردی کے خلاف جنگ دہشت گردوں کے خاتمہ تک جاری رہے گی۔

وزیر داخلہ رانا ثناءاللہ کا مزید کہنا تھا کہ ہم اپنے شہداء اور غازیوں کو سلام پیش کرتے ہیں، دکھ کی اس گھڑی پوری قوم شہداء اور زخمیوں کے اہل خانہ کے ساتھ کھڑی ہے۔

میرانشاہ: خودکش دھماکے میں پاک فوج کے 3 جوان شہید

پاک فوج کے شعبہ تعلقات عامہ (آئی ایس پی آر) کے مطابق شمالی وزیرستان کےعلاقے میرانشاہ میں خود کش دھماکا ہوا ہے جس کے نتیجے میں پاک فوج کے 3 جوان شہید ہوگئے ہیں۔

ترجمان پاک فوج نے بتایا کہ خود کش دھماکے میں شہید ہونے والوں میں نائب صوبیدارصاحب خان ،نائیک محمد ابراہیم، سپاہی جہانگیرخان شامل ہیں۔

آئی ایس پی آر نے بتایا کہ کارسوارخودکش حملہ آورنے خود کو دھماکے سے اڑایا،آئی ایس پی آر خودکش دھماکےمیں 3 شہری بھی شدید زخمی ہوئے، خودکش حملہ آور کا مقصد سیکیورٹی فورسزکی چیک پوسٹ کونشانہ بنانا تھا۔

ترجمان پاک فوج نے مزید کہا کہ سیکیورٹی فورسز دہشت گردی کی لعنت کوختم کرنے کے لیے پرعزم ہے، ہمارے بہادرسپاہیوں کی قربانیاں ہمارےعزم کو مزید مضبوط کرتی ہیں۔