قمر زمان کائرہ نے کہا ہے کہ وزارت امور کشمیر نے ہمیشہ وفاقی حکومت اور آزاد کشمیر حکومت کے درمیان ایک پل کا کردار ادا کیا ہے۔

تفصیلات کے مطابق آزاد جموں و کشمیر کے وزراء اور سیاسی قیادت کے ا یک وفد نے اسپیکر قانون ساز اسمبلی چوہدری لطیف اکبر کی سربراہی میں مشیر آمور کشمیر و گلگت بلتستان قمر زمان کائرہ سے اسلام آباد میں ملاقات کی ہے۔

ملاقات میں آزاد جموں و کشمیر کے سابق وزیر اعظم راجہ فاروق حیدر ، سئنیر وزارا کرنل (ر )وقار احمد نور، خواجہ فاروق احمد ، ماجد خان اور سید بازل علی نقوی سمیت دیگر اعلی حکام نے شرکت کی۔

ملاقات میں آزاد کشمیر کے مالیاتی ، سیاسی و ترقیاتی امور پر تفصیلی بات چیت کی گئی جبکہ ملاقات میں وفد نے وزیر امور کشمیر قمر زمان کائرہ کو آزاد کشمیر میں جاری ترقیاتی منصوبوں خصوصاً آزاد کشمیر قانون ساز اسمبلی کی نئی عمارت کی تعمیر کے حوالے سے فنڈز کی صورتحال سےمتعلق تفصیلی آگاہ کیا۔

ملاقات میں وزیر امور کشمیر نے اپنے خیالات کا اظہار کرتے ہوئے کہا کہ وزارت امور کشمیر نے ہمیشہ وفاقی حکومت اور آزاد کشمیر حکومت کے درمیان ایک پل کا کردار ادا کرتے ہوئے ہر اہم موقع پر آزاد کشمیر  حکومت کی ہر ممکن مدد کی ہے۔

وزیر امور کشمیر نے وفد کو یقین دلاتے ہوئے کہا کہ قانون ساز اسمبلی کے لیے فنڈز کی فراہمی کو یقینی بنانے کے لیے تمام متعلقہ فورمز سے رابطہ کیا جائے گا اور وزارت آمور کشمیر و گلگت بلتستان اس ضمن میں آزاد کشمیر حکومت کی ہر ممکن معاونت کرے گی۔