آسٹریلیا کا ایک فوجی ہیلی کاپٹر ایم آر ایچ-90 تائیپن گزشتہ رات بحرالکاہل میں گر کر تباہ ہو گیا ہے۔ 

غیر ملکی میڈیا کی خبروں کے مطابق آسٹریلیا کا ایم آر ایچ-90 تائیپن ہیلی کاپٹر کا عملہ گزشتہ رات ریاست کوئنز لینڈ کے قریب پانی میں گر کر تباہ ہونے کے بعد لاپتہ ہے۔

آسٹریلیا نے ہیلی کاپٹر حادثے میں چار فضائی عملے کے لاپتہ ہونے کے بعد امریکہ کے ساتھ فوجی مشقیں روک دی ہیں۔

آسٹریلوی وزیر دفاع رچرڈ مارلس نے بتایا کہ آسٹریلوی دفاعی فورس ایم آر ایچ 90 تائیپن ہیلی کاپٹر شمال مشرقی ریاست کوئنز لینڈ کے قریب مقامی وقت کے مطابق رات ساڑھے دس بجے کے قریب سمندر میں گر کر تباہ ہو گیا۔

رچرڈ مارلس نے کہا کہ چاروں فضائی عملے کے اہل خانہ کو اس واقعے سے آگاہ کر دیا گیا ہے اور ہماری امیدیں اور خیالات فضائی عملے اور ان کے اہل خانہ کے ساتھ ہیں۔

یہ ہیلی کاپٹر جاپان، فرانس اور جرمنی سمیت 13 ممالک کی مشترکہ فوجی مشق میں حصہ لے رہا تھا جس میں 30 ہزار سے زائد اہلکار شریک تھے۔

حکام نے اس واقعے کی کوئی وجہ نہیں بتائی ہے اور نہ ہی یہ اشارہ دیا ہے کہ مشقیں کب دوبارہ شروع ہوں گی۔

آسٹریلیا کے فوجی ہیلی کاپٹر کا ملبہ آج مل گیا ہے تاہم عملے کے لاپتہ ارکان کا تاحال کوئی سراغ نہیں مل سکا ہے۔

کوئنز لینڈ پولیس کے سپرنٹنڈنٹ ڈگلس میکڈونلڈ کا کہنا ہے کہ ہمیں ملبے کی متعدد اشیا ملی ہیں جو بظاہر لاپتہ ہیلی کاپٹر سے ملی ہیں۔’

سپرنٹنڈنٹ ڈگلس میکڈونلڈ نے کہا کہ عملے کے زندہ ملنے کی امید کم نہیں ہوئی ہے اور اس وقت یہ ایک سرچ اینڈ ریسکیو آپریشن ہے۔

بریگیڈیئر ڈیمین ہل نے کہا کہ مشقوں کو روک دیا گیا ہے تاکہ شرکاء اپنے اہل خانہ تک پہنچ سکیں اور بتا سکیں کہ کیا ہو رہا ہے.

امریکی وزیر دفاع لائیڈ آسٹن، جو امریکی وزیر خارجہ انٹونی بلنکن کے ساتھ بات چیت کے لئے آسٹریلیا میں ہیں، نے لاپتہ فضائی عملے کو خراج تحسین پیش کیا۔

اگر آپ حالاتِ حاضرہ سے باخبر رہنا چاہتے ہیں تو ہمارےفیس بک پیج https://www.facebook.com/BOLUrduNews/ کو لائک کریں