بھارتی کرکٹ بورڈ (بی سی سی آئی) نے ورلڈکپ سے قبل سابق فاسٹ بولر اجیت اگرکر کو سلیکشن کمیٹی کا سربراہ مقرر کردیا۔ 

بھارتی میڈیا رپورٹس کے مطابق  سابق فاسٹ باؤلر اجیت اگرکر کو متفقہ رائے سے پانچ رکنی کمیٹی کا سربراہ منتخب ہونے کے بعد مینز کرکٹ ٹیم کا چیف سلیکٹر تعینات کردیا گیا ہے۔

سابق بھارتی فاسٹ باؤلر اجیت اگرکر کی تعیناتی اس وقت ہوئی جب سابق چیف سلیکٹر چیتن شرما کی جانب سے اسٹنگ آپریشن میں کھلاڑیوں پر الزام عائد کیا گیا تھا کہ پلئیرز خود کو فٹ رکھنے کے لیے انجکشن لگاتے ہیں، جس کے بعد انہیں آسٹریلیا میں شیڈول ٹی ٹوئنٹی ورلڈکپ کے بعد عہدے سے برطرف کردیا گیا تھا۔

سابق بھارتی فاسٹ بولر اجیت اگرکر انڈین پریمیئر لیگ (آئی پی ایل) کی ٹیم دہلی کیپٹلز کی کوچنگ کرچکے ہیں تاہم وہ حالیہ ٹورنامنٹ کے بعد عہدے سے الگ ہوگئے تھے۔

بی سی سی آئی نے ایک بیان میں کہا کرکٹ ایڈوائزری کمیٹی (سی اے سی) نے مینز سلیکشن کمیٹی میں سلیکٹر کے عہدے کے لیے  درخواست دہندگان کا انٹرویو کیا تھا، تین رکنی کمیٹی نے اجیت اگرکر کے نام کو فائنل کیا۔

اجیت اگرکر کو سلیکشن کمیٹی کا سربراہ نامزد کیا گیا ہے اور ان کے علاوہ جو شیو سندر داس، سبروتو بنرجی، سلیل انکولا اور سریدھرن شرتھ بھی کمیٹی کا حصہ ہیں۔

واضح رہے کہ 45 سالہ اگرکر نے بھارت کیلئے 26 ٹیسٹ، 191 ون ڈے انٹرنیشنل جبکہ 4 ٹی20 میچز کھیلے ہیں، تینوں فارمیٹس میں انکی وکٹوں کی تعداد 349 ہے۔