عراق کے شہر بصرہ میں گرڈ اسٹیشن میں شدید گرمی کے باعث گرڈ اسٹیشن میں آگ بھڑک اٹھی جس سے بجلی کی فراہمی معطل ہو گئی۔

غیر ملکی میڈیا کی رپورٹس کے مطابق جنوبی عراق میں ایک بجلی گھر میں آگ لگنے اور متعدد دھماکوں نے درجہ حرارت میں اضافے کے ساتھ ملک کے بیمار قومی بجلی گرڈ کو متاثر کیا ہے۔

عراق کی وزارت بجلی کی جانب سے ہفتے کے روز جاری ہونے والے ایک بیان میں کہا گیا ہے کہ جنوبی شہر بصرہ میں البکر اسٹیشن پر دوپہر کے وقت آگ بھڑک اٹھی۔

دھماکے کے نتیجے میں جنوبی اور وسطی علاقوں کو ملانے والی ٹرانسمیشن لائنوں کو الگ کیا گیا اور اس کے نتیجے میں علاقے میں بجلی کا نظام “مکمل طور پر بند” ہوگیا۔

غیر ملکی خبر رساں ادارے نے وزارت کے ترجمان احمد موسیٰ کے حوالے سے بتایا ہے کہ بجلی کی بندش کی وجہ سے پورے عراق کو بجلی کی فراہمی متاثر ہوئی ہے۔

ایک مقامی ٹرانسمیشن کمپنی کے مطابق ہفتے کے روز شمال میں بجلی کے تین ٹاوروں کو بھی مبینہ طور پر تخریب کاری کے حملوں کا نشانہ بنایا گیا تھا۔

کمپنی کا کہنا تھا کہ ٹاورز کو دیسی ساختہ دھماکہ خیز آلات سے نشانہ بنایا گیا تھا، جس سے عارضی طور پر سروس منقطع ہوگئی تھی۔

کمپنی نے یہ نہیں بتایا کہ اس حملے کا ذمہ دار کون ہے، لیکن داعش کے جنگجوؤں اور دیگر مسلح گروہوں کے بارے میں معلوم ہوا ہے کہ وہ علاقے میں سرگرم ہیں۔

مشرقی بغداد میں صدر شہر کے اندر واقع جمیلہ محلے میں بجلی کے اسٹیشن میں رات کے وقت آگ بھڑکتی ہوئی دکھائی دے رہی ہے۔

بغداد میونسپلٹی کا کہنا ہے کہ بصرہ میں آتشزدگی کی وجہ سے ہونے والی بندش کا دیگر خدمات پر اثر پڑا، جیسے نل کے پانی کی فراہمی میں خلل، اور وہ شہریوں پر اثرات کو محدود کرنے کے لئے جنریٹرز کا استعمال کرتے ہوئے پانی کے پمپ چلانے کی کوشش کر رہے ہیں۔

بہت سے گھرانے ہنگامی سپلائی کے لئے پڑوس کے جنریٹرز لائٹ کے کنکشن حاصل کئے کیونکہ ملک کو موسم گرما کے دوران باقاعدگی سے بجلی کی بندش کا سامنا کرنا پڑتا ہے۔

عراق تیل کی دولت سے مالا مال ملک ہے، لیکن اس کا خستہ حال پاور گرڈ شدید گرمیوں میں اپنی طلب کو پورا کرنے سے قاصر رہتا ہے، جس کی وجہ سے درجہ حرارت بڑھنے کی وجہ سے بہت سے لوگ بجلی سے محروم ہو جاتے ہیں۔

اگر آپ حالاتِ حاضرہ سے باخبر رہنا چاہتے ہیں تو ہمارےفیس بک پیج https://www.facebook.com/BOLUrduNews/ کو لائک کریں