بھارت میں ریلوے پولیس کے کانسٹیبل نے چلتی ٹرین میں چار افراد کو گولیاں مار کر ہلاک کر دیا۔

برطانوی خبر رساں ادارے کے مطابق بھارتی ریلوے پروٹیکشن فورس (آر پی ایف) کے ایک کانسٹیبل کو ممبئی کے قریب چلتی ٹرین میں چار افراد کو گولی مار کر ہلاک کر دیا۔

حکام کا کہنا ہے کہ ملزم چیتن کمار نے آر پی ایف کے ایک سینئر افسر اور تین مسافروں کو ہلاک کر دیا۔

حکام کا کہنا ہے کہ کانسٹیبل نے فرار ہونے کی کوشش کی لیکن اسے گرفتار کر لیا ہے۔

انہوں نے کہا کہ وہ اس کے مقصد کی تحقیقات کر رہے ہیں اور ہلاک ہونے والے مسافروں کی شناخت کرنے کی کوشش کر رہے ہیں۔

آر پی ایف اہلکاروں کو ہندوستان میں ریلوے مسافروں اور املاک کی حفاظت کا کام سونپا گیا ہے۔

فائرنگ کا یہ واقعہ مقامی وقت کے مطابق ساڑھے پانچ بجے کے قریب مغربی ریاست راجستھان کے شہر جے پور سے مہاراشٹر کے شہر ممبئی جانے والی ٹرین میں پیش آیا۔

آر پی ایف کے ایک بیان کے مطابق کمار نے پہلے آر پی ایف کے اسسٹنٹ سب انسپکٹر ٹیکا رام مینا پر گولی چلائی اور اس کے بعد تین دیگر مسافروں کو گولی مار دی۔

یہ واقعہ ریاست کے دارالحکومت ممبئی سے تقریبا 96 کلومیٹر دور پالگھر قصبے سے گزرنے کے فورا بعد پیش آیا۔

مغربی ریلوے کے ایک بیان کے مطابق چیتن کمار نے اس کے بعد ایمرجنسی کی صورت میں ٹرینوں کو روکنے کے لئے استعمال ہونے والی ان ہاؤس الارم چین کھینچی اور فرار ہونے کی کوشش کی۔ اسے ممبئی کے مضافات سے گرفتار کیا گیا تھا۔

مغربی ریلوے کے جنرل منیجر نیرج ورما نے نامہ نگاروں کو بتایا کہ یہ واقعہ انتہائی افسوسناک ہے۔ ہمیں آر پی ایف کانسٹیبل اور اسسٹنٹ سب انسپکٹر کے درمیان کسی بحث کے بارے میں کوئی اطلاع نہیں ملی ہے۔

اگر آپ حالاتِ حاضرہ سے باخبر رہنا چاہتے ہیں تو ہمارےفیس بک پیج https://www.facebook.com/BOLUrduNews/ کو لائک کریں