سابق پرنسپل سیکریٹری اعظم خان چیئرمین تحریک انصاف کے خلاف وعدہ معاف گواہ بن گئے۔ 

سابق وزیراعظم کے پرنسپل سیکریٹری اعظم خان نے چیئرمین تحریک انصاف کے خلاف 164 کا بیان ریکارڈ کرا دیا۔

ذرائع کے مطابق اعظم خان نے 164 کا بیان مجسٹریٹ کے سامںے ریکارڈ کرایا، 164 کے بیان میں سابق وزیراعظم کے پرنسپل سیکریٹری نے چیئرمین تحریک انصاف کے خلاف چارج شیٹ پیش کردی۔

ذرائع کا کہنا ہے کہ اعظم خان نے سائفرسے متعلق اہم انکشافات کیے ہیں جس میں کہا گیا کہ لہرایا جانے والا سائفرجعلی تھا اوریہیں پربنایا گیا، حکومت کو گھر بھیجنے میں کوئی امریکی سازش نہیں تھی۔

سابق وزیراعظم کے پرنسپل سیکریٹری نے ہوش ربا انکشافات کیے اورسائفر ڈراما بے نقاب کردیا جس میں کہا گیا کہ عمران خان نے تمام ترحقائق کو چھپا کر سائفر کا جھوٹا اور بے بنیاد بیانیہ بنایا۔ تحریک عدم اعتماد سے بچنے کے لیے سائفر کو بیرونی سازش کا رنگ دیا۔

اعظم خان کے مطابق سربراہ پی ٹی آئی نے کہا “سائفر کو غلط رنگ دے کرعوام کا بیانیہ بدل دوں گا”، سابق وزیراعظم نے سائفر مجھ سے 9 مارچ کو لے لیا اور بعد میں گم کردیا۔ انھوں نے سائفر ڈراما کے ذریعے عوام میں ملکی سلامتی اداروں کے خلاف نفرت کا بیج بویا۔

اعظم خان کا کہنا ہے کہ منع کرنے کے باوجود ایک سیکرٹ مراسلے کو عوام میں ذاتی مفاد کے لیے لہرایا۔ سائفر کو ملکی سلامتی اداروں اور امریکا کی ملی بھگت کا جان بوجھ کرغلط بتایا گیا۔ سائفر ڈراما صرف اور صرف اپنی حکومت بچانے کے لیے رچایا۔

8 مارچ 2022 کو سیکریٹری خارجہ نے اعظم خان کو سائفر کے بارے میں بتایا۔ شاہ محمود قریشی وزیراعظم کو سائفر کے متعلق پہلے ہی بتا چکے تھے۔ سابق وزیراعظم نے سائفرکو اپوزیشن اور اسٹیبلشمنٹ کے خلاف بیانیہ بنانے کے لئے استمعال کرنے کا فیصلہ کیا۔

سابق وزیراعظم نے سائفر اپنے پاس رکھ لیا جو کہ قانون کی خلاف ورزی تھی۔ سائفر واپس مانگنے پر انھوں نے اس کے گم ہونے کے متعلق بتایا۔

اعظم خان کے مطابق چیئرمین تحریکِ انصاف نے ان کے سامنے سائفر کو عوام کے سامنے بیرونی سازش کے ثبوت کے طور پر پیش کرنے کی بات کی۔ 28 مارچ کو بنی گالا میٹنگ اور 30 مارچ کو اسپیشل کیبنٹ میٹنگ میں سائفر کا معاملہ زیربحث آیا۔ میٹنگز میں سیکریٹری خارجہ نے شرکا کو سائفر کے مندرجات کے متعلق بتایا۔