مریم اورنگزیب نے کہا کہ سازش کے تحت پاکستان کی ترقی اور سی پیک کو روکا گیا، ہم نے اداروں کو نیلام نہیں کیا، انھیں کھڑا کیا۔

وفاقی وزیراطلاعات مریم اورنگزیب نے نیوز کانفرنس میں کہا کہ نواز شریف کو ہٹانے کے لیے اقامہ کا سہارا لیا گیا۔ پاکستان کی ترقی کو روکنے کےلیے نوازشریف کو جھوٹے کیس میں نااہل کیا گیا۔ انھیں تاحیات نااہل کیا گیا۔

مریم اورنگزیب نے کہا کہ طلال چوہدری اور دانیال عزیز نے جو جرم کیا ہی نہیں اس کی سزا بھگتی، ان دونوں نے نواز شریف کا ساتھ نہیں چھوڑا۔ طلال چوہدری اور دانیال عزیز استقامت کے ساتھ کھڑے رہے۔

وفاقی وزیراطلاعات نے کہا کہ طلال چوہدری اور دانیال عزیز کی نااہلی ختم ہوگئی، طلال چوہدری اور دانیال عزیز کو کہا گیا کہ مریم نواز کے خلاف بیان دو، یہ لوگ آج بھی قیادت کے ساتھ کھڑے ہیں۔

انھوں نے کہا کہ پیمرا بل قومی اسمبلی سے پاس ہوگیا، وزیراعظم نے میڈیا کے ساتھ ری اسٹرکچرنگ کا وعدہ کیا تھا۔ پندرہ ماہ میں موجودہ حکومت نے پاکستان کو ڈیفالٹ سے بچایا، گزشتہ حکومت عوام دشمنی کرکے گئی تھی۔ چیئرمین پی ٹی آئی نے آئی ایم ایف سے معاہدہ توڑ کر ملک سے دشمنی کی۔

مریم اورنگزیب نے کہا کہ سازش کے تحت پاکستان کی ترقی اور سی پیک کو روکا گیا۔ موجودہ حکومت نے آئی ایم ایف معاہدہ بحال کیا۔ 2018 میں چیئرمین پی ٹی آئی کو مسلط کرکے ملک کی ترقی کا سفر روکا گیا۔ ہم نے اداروں کو نیلام نہیں کیا ہم نے اداروں کو دوبارہ کھڑا کیا۔