کم سن ملازمہ رضوانہ تشدد کیس میں سول جج عاصم حفیظ کونوکری سےبرخاست کرنےکی درخواست سماعت کیلئے منظورکرلی گئی۔

تفصیلات کے مطابق اسلام آباد ہائیکورٹ میں کم سن بچی رضوانہ پر سول جج عاصم حفیظ کی اہلیہ کی جانب سے تشدد کے معاملے میں سول جج عاصم حفیظ کو نوکری سے برخاست کرنے کے لیے دائر درخواست سماعت کے لیے منظورکرلی گئی۔

اسلام آباد ہائی کورٹ نے وفاقی حکومت اور ایڈوکیٹ جنرل افس کو نوٹس جاری کرتے ہوئے معاونت کے لیے طلب کرلیا۔

اسلام آباد ہائی کورٹ کے چیف جسٹس عامر فاروق نے سول سوسائٹی کی درخواست پر سماعت کی، چیف جسٹس نے ڈپٹی اٹارنی جنرل احسن رضا اور اسٹیٹ کونسل ذوہیب گوندل کو روسٹرم پر طلب کر لیا اور کہا کہ یہ معاملہ ویسے تو ایڈمنسٹریٹو سائیڈ پر ہے لیکن ہم جوڈیشل سائیڈ پر بھی دیکھیں گے۔

 چیف جسٹس عامر فاروق نے کہا کہ ہمارے پاس اس حوالے سے تفصیلی درخواست آئی یے، بچوں پر تشدد اور چائلڈ لیبر سے متعلق فیڈریشن کو دیکھنا چاہیے۔

سماعت کے دوران چیف جسٹس اسلام آباد ہائی کورٹ عامر فاروق نے طیبہ تشدد کیس کا حوالہ دیتے ہوئے کہا کہ اس سے قبل کم سن طیبہ تشدد کیس سمیت متعدد واقعات سامنے آئے ہیں، ہم اس درخواست پر وفاق اور ایڈوکیٹ جنرل آفس کو نوٹس کر رہے ہیں۔

اسٹیٹ کونسل نے کہا کہ ہمیں درخواست کی کاپی فراہم کی جائے تاکہ ہم کیس کی تیاری کر لیں۔

درخواست سول سوسائٹی نیٹ ورک اسلام آباد کے صدرعبداللہ ملک نے دائر کی تھی، سول جج عاصم حفیظ کی اہلیہ کم سن رضوانہ پر تشدد کرنے کے الزام میں جوڈیشل ریمانڈ پر ہیں۔

سول جج عاصم حفیظ کو تشدد کیس کی وجہ سے لاہورہائی کورٹ نے او ایس ڈی بنا رکھا ہے۔

عدالت نے کیس کی سماعت غیر معینہ مدت تک ملتوی کر دی۔

اگر آپ حالاتِ حاضرہ سے باخبر رہنا چاہتے ہیں تو ہمارےفیس بک پیج https://www.facebook.com/BOLUrduNews/ کو لائک کریں۔

ٹوئٹر پر ہمیں فالو کریں https://twitter.com/bolnewsurdu01 اور حالات سے باخبر رہیں۔

پاکستان سمیت دنیا بھر سے خبریں دیکھنے کے لیے ہمارے  کو سبسکرائب کریں   اور بیل آئیکن پر کلک کریں۔