سابق وزیراعلٰی پنجاب چوہدری پرویزالٰہی کی رہائی کے معاملے پرحکومت پنجاب کی اپیل پرسماعت سرکاری وکیل کے پیش نہ ہونے کے باعث ملتوی کردی گئی۔

تفصیلات کے مطابق لاہورہائی کورٹ میں چوہدری پرویزالٰہی کی رہائی کے حکم کیخلاف حکومت پنجاب کی اپیل پر سماعت ہوئی۔ عدالت نے سرکاری وکیل کے پیش نہ ہونے پر سماعت 7 اگست تک ملتوی کردی۔

دو رکنی بنچ نے سنگل بنچ کے فیصلے کو معطل کر رکھا ہے، عدالت نے اپیل پر چوہدری پرویز الٰہی سمیت فریقین کو نوٹس جاری کر رکھے ہیں۔

جسٹس ساجد محمود سیٹھی کی سربراہی میں دو رکنی بنچ نے پنجاب حکومت کی اپیل پر سماعت کی۔ پنجاب حکومت نے سنگل بنچ کے فیصلے کو چیلنج کرتے ہوئے انٹرا کورٹ اپیل دائر کی۔ انٹرا کورٹ اپیل میں چوہدری پرویز الٰہی، ایف آئی اے سمیت دیگر کو فریق بنایا گیا ہے۔

درخواست گزار نے مؤقف اپنایا کہ عدالت عالیہ کے سنگل بنچ نے 14 جولائی کو چوہدری پرویزالٰہی کی ضمانت منظور کرنے کا فیصلہ دیا، سنگل جج کو تھانہ غالب مارکیٹ اور گجرات انٹی کرپشن کیس میں حفاظتی ضمانت نہ دینے کی استدعا کی۔۔ سنگل جج کو بتایا گیا کہ عبوری ضمانت درخواست پر حفاظتی ضمانت نہ لی جائے۔

درخواست گزارکا مؤقف تھا کہ سنگل جج نے خلاف قانون دو مقدمات میں پرویزالٰہی کی حفاظتی ضمانت منظور کی، سنگل جج نے 14 جولائی کا فیصلہ آئین اور قانون کی منشا کے خلاف جاری کیا، استدعا ہے کہ عدالت سنگل بنچ کا چوہدری پرویز الٰہی کی ضمانت کا فیصلہ کالعدم قرار دے اورآپیل کے فیصلے تک سنگل بنچ کا فیصلہ معطل کیا جائے۔

اگر آپ حالاتِ حاضرہ سے باخبر رہنا چاہتے ہیں تو ہمارےفیس بک پیج https://www.facebook.com/BOLUrduNews/ کو لائک کریں