عدالت نے سانحہ بلدیہ فیکٹری کیس میں ملزمان کی سزاؤں کیخلاف اپیل میں اہم گواہوں کی فہرست مرتب کرنےکا حکم دے دیا۔

سندھ ہائیکورٹ میں سانحہ بلدیہ فیکٹری کیس میں سزاؤں کے خلاف ملزمان کی اپیل اور چار ملزمان کی بریت کے خلاف سرکاری کی اپیلوں کی سماعت ہوئی۔

ملزمان رحمان بھولا اور زبیر کی سزائے موت کے خلاف اپیلوں کی سماعت کے دوران ایم کیو ایم رہنما رؤف صدیقی و دیگر عدالت میں پیش ہوئے۔

عدالت نے اہم گواہوں کی فہرست مرتب کرنے کا حکم دیتے ہوئے کہا کہ بلدیہ فیکٹری آتشزدگی بڑا سانحہ تھا، تمام عوامل کا جائزہ ضروری ہے۔

سماعت کے دوران عدالت کو ملزمان پر عائد ہونے والی فردجرم کا متن پڑھ کر سنایا گیا، سرکاری وکیل نے کہا کہ ٹرائل کورٹ میں 400 گواہان ہے بیانات قلم بند کیے گیے تھے۔

وکیل ملزمان نے بتایا کہ ٹرائل کے دوران چالیس سے زائد گواہوں کے بیانات پر جرح کی گئی۔ کیس میں چار چالان پیش کئے گئے۔

حسان صابر ایڈووکیٹ نے کہا کہ ملزمان پر جے آئی ٹی کو مدنظر رکھتے ہوئے فردجرم عائد کی گئی، ٹرائل کے دوران 159 افراد کی جنہوں نے میتیں وصول کیں ان کے بیانات نہیں ریکارڈ کیے گئے۔ موقع پر موجود ریسیکو ٹیموں اور پولیس اہلکاروں کے بیانات پر بھی جرح نہیں کی گئی۔

وکیل ملزمان نے کہا کہ اپیل میں تمام پہلوؤں کا جائزہ لینا ضروری ہے، جس کے بعد عدالت نے 28 اگست کو مزید تفصیلات طلب کرلیں۔

واضح رہے کہ انسداد دہشت گردی عدالت نے ملزمان دو ملزمان رحمان بھولا اور زبیر چریا کو سزائے موت سنائی تھی۔ دیگر چار ملزمان کو عمر قید کی سزا سنائی تھی۔ عدالت نے رؤف صدیقی سمیت 4 ملزمان کو عدم شواہد کی بنا پر بری کردیا تھا۔

اگر آپ حالاتِ حاضرہ سے باخبر رہنا چاہتے ہیں تو ہمارےفیس بک پیج https://www.facebook.com/BOLUrduNews/ کو لائک کریں۔