لاہورہائی کورٹ نے سابق وزیراعلٰی پنجاب چوہدری پرویزالٰہی کو رہا کرنے کا حکم دے دیا۔

تفصیلات کے مطابق لاہور ہائی کورٹ میں سابق وزیراعلٰی پنجاب چوہدری پرویزالہی کو گرفتارنہ کرنے کےعدالتی حکم پرعمل درآمد کیس کی سماعت ہوئی۔

عدالت نے کہا کہ عدالت اس معاملے کی انکوائری کرے گی۔ عدالت ابھی حکم جاری کرتی ہے کہ چوہدری پرویز الہی کو کوئی ایجنسی، ادارہ یا اتھارٹی گرفتار نہیں کرے گی۔

لاہور ہائیکورٹ میں سماعت کے دوران چوہدری پرویزالہی کو کمرہ عدالت پہنچایا گیا۔ پرویز الہی نے گاڑی سے نکل کرورکروں کو ہاتھ ہلا کرسلام کیا۔

جسٹس امجد رفیق  کی عدالت میں کمرہ عدالت وکلا سے کھچاکھچ بھرگیا جس کے بعد کمرہ عدالت کو اندر سے بند کردیاگیا۔ کمرہ عدالت کے باہر سیکیورٹی کے سخت انتظامات کیے گئے۔

اس سے قبل عدالت نے سماعت کرتے ہوئے عدالت نے پرویز الہی کو ایک گھنٹے میں عدالت پیش کرنے کاحکم دیتے ہوئے کہا کہ اگر پرویز الہی کو پیش نہ کیا گیا تو ڈی جی نیب کےوارنٹ گرفتاری جاری کیے جائیں گے۔

نیب کے پراسیکیوٹر نے کہا کہ پنجاب حکومت نے نیب کو سیکیورٹی فراہمی سے معذوری ظاہر کی ہے جس پرجسٹس امد رفیق نے کہا کہ عدالت سے پنگ پونگ کھیلا جارہاہے۔ کیا جج کو بھی ملزم تو نہیں بنایا جا رہا۔ عدالت کو بڑا افسوس ہورہاہے کہ جوکچھ ہورہاہے وہ کبھی نہیں ہوا۔ یہ آئینی عدالت ہے اورآئین کا تحفظ عدلیہ کی ذمہ داری ہے۔

ایڈیشنل ایڈووکیٹ جنرل نے عدالت سے کہا کہ مختلف آپریشنزکی وجہ سے فوری طور پر اے پی سی کو لاہور تک منگوانے کےلئے وقت چاہئیے۔

رہا ہونے کے بعد چوہدری پرویزالہی نے بول نیوز سے گفتگوکرتے ہوئے کہا کہ یہ عدلیہ آئین اور قانون کی فتح ہے۔ عدالتی فیصلے سے ہی رہائی ممکن تھی۔ ملکی عدالتیں آزاد ہیں حق کی فتح ہوئی ہے۔

عدالتی حکم کے باوجود نیب حکام اور پولیس اہلکاروں کے درمیان کھینچا تانی جاری ہے۔ نیب حکام پولیس اہلکاروں سے ہنگامہ آراٸی کرتے ہوٸے گاڑی بھگا لے گٸے۔ پولیس اہلکار اصرارکرتے رہے کہ ایف آٸی اے نے پرویز الہی کو گرفتار کرنا ہے۔ پولیس اہلکار نیب کی گاڑی میں چڑھ گٸے نیب حکام نے دھکے مار کر اتارا۔

ایڈیشنل ڈی جی اینٹی کرپشن وقاص الحسن بھی کمرہ عدالت کے باہر پہنچ گئے، احاطہ عدالت میں پولیس کی بھاری نفری کو الرٹ کر دیا گیا۔

لاہورہائیکورٹ کے جسٹس امجد رفیق نے ایس پی ہائیکورٹ سیکیورٹی کو چیمبر میں طلب کرلیا، عدالتی حکم پر ہائیکورٹ سیکیورٹی پر مامور افسر چیمبر میں پیش ہوئے، عدالت نےچویدری پرویزالہی کو سیکیورٹی فراہم کرنے کی ہدایت کردی۔

قانون دان لطیف کھوسہ مبارکباد دینے چوہدری پرویز الہی کےپاس کمرہ عدالت پہنچ گئے، چوہدری پرویز الہی نے لطیف کھوسہ کو گلے لگا لیا۔

لاہورہائی کورٹ نے ڈی آئی آپریشنز اور ایڈیشنل ڈی جی اینٹی کرپشن کو بھی چیمبرمیں طلب کرلیا۔

بعدازاں عدالتِ عالیہ نے  چوہدری پرویز الٰہی کو فوری رہا کرنے کا حکم دینے کاتحریری فیصلہ جاری کردیا جس میں کہا گیا کہ  نیب سمیت کوئی بھی ادارہ، اتھارٹی یاایجنسی پرویز الہی کوگرفتار نہ کرے۔

پرویزالہی کو نظربندی قانون کےتحت بھی نظربند نہ کرنے کافیصلہ جاری کردیا۔ عدالت کاتحریری فیصلہ دو صفحات پر مشتمل ہے۔

جسٹس امجد رفیق نے تحریری فیصلہ جاری کرتے ہوئے اپنے فیصلے پر من و عن عمل درآمد کاحکم دیا اورعدالتی فیصلے کی کاپی ڈی آئی آپریشنز کےحوالے کردی گئی۔

پرویز الہی وکلاء کےہمراہ عدالتی روسٹرم پرآئے اور وکیل لطیف کھوسہ نے عدالت سے کہا کہ عدالت کا فیصلہ بڑا واضع ہے۔ عدالتی فیصلے موجود ہیں کہ کسی کو بھی عدالتی احاطے سے گرفتار نہیں کیاجاسکتا۔ پولیس ہائی کورٹ میں موجود ہے۔ عدالت پرویز الہی کو گھر تک سیکیورٹی کی فراہمی کا حکم دے۔

عدالتی حکم پر ایس پی ماڈل ٹاون عدالت پیش ہوئے اور بتایا کہ امن وامان کی صورتحال کےپیش نظر پولیس یہاں موجود ہے جس کے بعد عدالت نے لا افسر کےہمراہ پولیس کو چوہدری پرویزالہی کو گھر تک سیکیورٹی فراہم کرنے کاحکم دے دیا۔

لاہورہائی کورٹ نے عدالتی حکم پرعمل درآمد کرانے کےلئے رجسٹرار کوطلب کرلیا۔ عدالتی حکم پرایڈیشنل رجسٹرارسیکیورٹی رائے ظہورعدالت میں پیش ہوئے۔

عدالت نے حکم دیا کہ عدالتی سیکیورٹی کے اہلکار پولیس کےہمراہ درخواست گزارکو گھر تک چھوڑ کرآئیں۔ درخواست گزارکی جان کو خطرات ہیں کوئی ایسا واقعہ نہ ہواسی لیےعدالتی اہلکار ساتھ جائیں۔

چوہدری پرویزالہی پولیس افسروں کی حفاظت میں عدالت سے روانہ ہوگئے۔

اگر آپ حالاتِ حاضرہ سے باخبر رہنا چاہتے ہیں تو ہمارےفیس بک پیج https://www.facebook.com/BOLUrduNews/ کو لائک کریں۔

ٹوئٹر پر ہمیں فالو کریں https://twitter.com/bolnewsurdu01 اور حالات سے باخبر رہیں۔

پاکستان سمیت دنیا بھر سے خبریں دیکھنے کے لیے ہمارے  کو سبسکرائب کریں   اور بیل آئیکن پر کلک کریں۔