کے پی کے نگراں حکومت کی جانب سے افسران کی پوسٹنگ ٹرانسفراورغیر قانونی اختیارات کےاستعمال کیخلاف دائر درخواست پرعدالت نے نوٹس جاری کردیے۔

تفصیلات کے مطابق نگراں حکومت کی جانب سے افسران کی پوسٹنگ ٹرانسفراورغیر قانونی اختیارات کے استعمال کے خلاف دائر درخواست کی سماعت ہوئی۔

پشاورہائی کورٹ میں سماعت جسٹس ایس ایم عتیق شاہ اور جسٹس وقار احمد نے کی۔

وکیل درخواست گزار فواد الرحمان ایڈووکیٹ نے دلائل دیے کہ نگران حکومت افسران کی مسلسل غیر قانونی پوسٹنگ ٹرانسفر کر رہی ہے، پوسٹنگ ٹرانسفر پر 22 جنوری 2023 کو الیکشن کمیشن نے پابندی عائد کی ہے۔

 وکیل درخواست گزارنے کہا کہ پابندی کے باوجود نگراں حکومت پوسٹنگ ٹرانسفر کر رہی ہے۔ نگراں حکومت کے اختیارات محدود ہیں۔ نگران حکومت اپنے اختیارات سے تجاوز کر رہی ہے۔

وکیل درخواست گزارکا مؤقف تھا کہ الیکشن ایکٹ 2017 کے سیکشن 230 کے تحت نگران حکومت الیکشن کمیشن کے اجازت کے بغیر پوسٹنگ ٹرانسفر نہیں کر سکتی۔ نگران حکومت کا کام صاف اور شفاف انتخابات کا انعقاد کرنا ہے۔ نگران حکومت کی ترقیاتی فنڈز کا استعمال اور پوسٹنگ ٹرانسفرغیرقانونی ہے۔

درخواست گزارنے استدعا کی کہ نگران حکومت کی پوسٹنگ ٹرانسفر سمیت دیگر غیر قانونی اقدامات کالعدم قراردی جائے۔

عدالت نے صوبائی حکومت اور الیکشن کمیشن کو نوٹسز جاری کرکے جواب طلب کرلیا۔

اگر آپ حالاتِ حاضرہ سے باخبر رہنا چاہتے ہیں تو ہمارےفیس بک پیج https://www.facebook.com/BOLUrduNews/ کو لائک کریں۔

ٹوئٹر پر ہمیں فالو کریں https://twitter.com/bolnewsurdu01 اور حالات سے باخبر رہیں۔

پاکستان سمیت دنیا بھر سے خبریں دیکھنے کے لیے ہمارے  کو سبسکرائب کریں   اور بیل آئیکن پر کلک کریں۔