تائیوان کی ایک فیکٹری میں آگ لگنے کے باعث 5 افراد ہلاک جبکہ 100 سے زائد افراد زخمی ہو گئے ہیں۔

غیر ملکی خبر رساں ادارے کی خبر کے مطابق جنوبی تائیوان میں گالف بال فیکٹری میں آگ لگنے اور اس کے بعد ہونے والے دھماکوں میں کم از کم پانچ افراد ہلاک اور 100 سے زائد زخمی ہوگئے جبکہ پانچ افراد اب بھی لاپتہ ہیں۔

رپورٹ کے مطابق پنگ تنگ کاؤنٹی میں واقع فیکٹری میں جمعے کی رات آگ بھڑک اٹھی اور رات بھر جاری رہی۔ حکام کا کہنا ہے کہ ہلاک ہونے والوں میں تین فائر فائٹرز بھی شامل ہیں۔

حکام کا کہنا ہے کہ امدادی کارکن فیکٹری میں کام کرنے والے چار مزدوروں اور ایک فائر فائٹر کی تلاش میں ہیں جن کا کوئی سراغ نہیں مل سکا ہے۔

100 سے زائد افراد کو زخمی حالت میں اسپتال لے جایا گیا جن میں سے بعض کی حالت نازک بتائی جا رہی ہے۔

تائیوان کے خبر رساں ادارے کے مطابق تائیوان کی صدر سائی انگ وین نے ہفتے کے روز تائی پے میں ایک تقریر میں متاثرین کے اہل خانہ سے تعزیت کا اظہار کیا اور کہا کہ وہ اس سانحے سے متاثرہ افراد کی عیادت کے لیے پنگ تنگ جائیں گی۔

صدر سائی انگ وین نے کہا کہ پنگ تنگ کاؤنٹی کی حکومت نے آگ سے متاثرہ افراد کی مدد کے لیے ایک ایمرجنسی آپریشن سینٹر قائم کیا ہے۔

پنگ تنگ کاؤنٹی کے مجسٹریٹ چو چن می نے ایک فیس بک پوسٹ میں کہا کہ آگ لگنے کی وجوہات کی تحقیقات جاری ہیں۔

مجسٹریٹ چو چن نے متاثرہ خاندانوں سے ملاقات کے بعد اپنی پوسٹ میں کہا کہ اہل خانہ کے غم کا سامنا کرتے ہوئے میں سر جھکانے، معافی مانگنے اور گہری تعزیت کا اظہار کرنے کے علاوہ کچھ نہیں کہہ سکتی۔

اگر آپ حالاتِ حاضرہ سے باخبر رہنا چاہتے ہیں تو ہمارےفیس بک پیج https://www.facebook.com/BOLUrduNews/ کو لائک کریں

ٹوئٹر پر ہمیں فولو کریں https://twitter.com/bolnewsurdu01 اور حالات سے باخبر رہیں

پاکستان سمیت دنیا بھر سے خبریں دیکھنے کے لیے ہمارے  کو سبسکرائب کریں   اور بیل آئیکن پر کلک کریں