ایلون مسک نے تجویز دی ہے کہ ایکس جسے پہلے ٹوئٹر کہا جاتا تھا کے تمام صارفین کو پلیٹ فارم تک رسائی کے لئے ادائیگی کرنا پڑسکتی ہے۔

برطانوی خبر رساں ادارے کی خبر کے مطابق اسرائیلی وزیر اعظم بینجمن نیتن یاہو کے ساتھ بات چیت میں ارب پتی ایلون مسک نے کہا کہ بوٹس کا مقابلہ کرنے کا واحد طریقہ ایکس کے استعمال کے لیے ادائیگی کا نظام ہے۔

ٹیسلا اور اسپیس ایکس کے سربراہ نے کہا کہ ہم سسٹم کے استعمال کے لئے ایک چھوٹی ماہانہ ادائیگی کرنے کی طرف بڑھ رہے ہیں۔

برطانوی خبر رساں ادارے نے مزید تفصیلات کے لیے ایکس سے رابطہ کیا لیکن ابھی تک کمپنی کی جانب سے کوئی بیان موصول نہیں ہوا ہے۔

یہ واضح نہیں ہے کہ آیا یہ محض ایلون مسک کا ایک تبصرہ تھا، یا مضبوط منصوبوں کا اشارہ تھا جن کا اعلان ابھی تک نہیں کیا گیا ہے۔

واضح رہے کہ ایلون مسک طویل عرصے سے کہہ رہے ہیں کہ سوشل میڈیا پلیٹ فارم پر بوٹس اور جعلی اکاؤنٹس سے چھٹکارا حاصل کرنے کا ان کا حل تصدیق کے لئے چارج کرنا ہے۔

گزشتہ سال ٹوئٹر کی ملکیت حاصل کرنے کے بعد سے انہوں نے صارفین کو ایک بہتر سروس کے لئے ادائیگی کرنے کی ترغیب دینے کی کوشش کی ہے ، جسے اب ایکس پریمیم کہا جاتا ہے۔

یہ ادائیگی کرنے والے صارفین کو زیادہ خصوصیات دے کر کیا گیا ہے ، جیسے لمبی پوسٹس اور پلیٹ فارم پر زیادہ نمائش کی سہولیات شامل ہیں۔

تاہم عام صارفین فی الحال مفت میں ایکس استعمال کرسکتے ہیں۔

اگرچہ صارفین کو چارج کرنے میں کمپنی کے لئے واضح مالی مفاد موجود ہے لیکن ایلون مسک نے زور دے کر کہا کہ لوگوں کو اس سروس کے لئے ادائیگی کرنے کا مقصد بوٹس سے نمٹنا ہے۔

ایلون مسک نے کہا کہ ایک بوٹ کی قیمت ایک پیسے کا ایک چھوٹا سا حصہ ہے لیکن اگر کسی کو کچھ ڈالر یا کچھ معمولی رقم بھی ادا کرنی پڑے، تو بوٹس کی مؤثر قیمت بہت زیادہ ہے.

ایکس پریمیم کی فی الحال امریکہ میں ماہانہ قیمت 8 ڈالر ہے۔ قیمت اس بات پر منحصر ہے کہ صارف کس ملک میں ہے۔

دنیا کے امیر ترین شخص ایلون مسک کا کہنا تھا کہ وہ اب صارفین کے لیے سستے آپشنز پر غور کر رہے ہیں۔

اگر آپ حالاتِ حاضرہ سے باخبر رہنا چاہتے ہیں تو ہمارےفیس بک پیج https://www.facebook.com/BOLUrduNews/ کو لائک کریں

ٹوئٹر پر ہمیں فولو کریں https://twitter.com/bolnewsurdu01 اور حالات سے باخبر رہیں

پاکستان سمیت دنیا بھر سے خبریں دیکھنے کے لیے ہمارے  کو سبسکرائب کریں   اور بیل آئیکن پر کلک کریں