آئی سی سی ورلڈکپ کے اٹھارہویں میچ میں آسٹریلوی اوپنرز نے پاکستان کے خلاف سب سے بڑی شراکت داری کا ریکارڈ قائم کردیا۔ 

بنگلورو کے چنا سوامی اسٹیڈیم میں ہونے والے میچ میں بابراعظم نے ٹاس جیت کر آسٹریلیا کو بیٹنگ کی دعوت دی تو کینگروز نے اس کا بھرپور فائدہ اٹھاتے ہوئے پاکستان کے خلاف بڑا ٹوٹل بنادیا۔ آسٹریلیا نے مقررہ 50 اوورز میں 9 وکٹ کے نقصان پر 367 رنز بنائے۔

آسٹریلیا کی جانب سے اننگز کا آغاز کرنے والے اوپننگ بلے باز ڈیوڈ وارنر اور مچل مارش نے نہ صرف ٹیم کو اچھا آغاز فراہم کیا بلکہ دونوں بلے بازوں نے آغاز سے ہی پاکستانی بولرز کی درگت بنائی۔

ڈیوڈ وارنر اور مچل مارش کے درمیان پہلی وکٹ کے لیے 259 رنز کی شراکت داری قائم ہوئی جو کہ پاکستان کے خلاف ورلڈکپ میں کسی بھی وکٹ پر سب سے بڑی شراکت داری ہے۔

مچل مارش 108 گیندوں پر 121 رنز بنانے کے بعد آؤٹ ہوئے، ان کی اننگز میں 9 چھکے اور 10 چوکے شامل تھے جب کہ ڈیوڈ وارنر نے 150 رنز کا ہندسہ عبور کیا۔ وہ 124 گیندوں پر 163 رنز بنانے کے بعد آؤٹ ہوئے اور ان کی اننگز میں 9 چھکے اور 14 چوکے شامل ہیں۔

پاکستان کے خلاف پہلی مرتبہ کسی ٹیم نے ورلڈ کپ میں 200 رنز کی شراکت بنائی ہے۔ اس سے قبل ویسٹ انڈیز کے برائن لارا اور ڈیسمونڈ ہائنس نے 1992 میں پاکستان کے خلاف 175 رنز کی شراکت بنائی تھی۔