بھارتی فوج نے جمعرات کی رات ظفر وال سکیٹر میں کواڈ کوپٹر ڈرون کی مدد سے دراندازی کی کوشش کی لیکن پاکستانی فورسز نے بروقت کارروائی کرتے ہوئے ڈرون کو مار بھگایا۔

بعد ازاں بھارتی بارڈر فورس نے ظفر وال سیکٹر پر بلااشتعال فائرنگ کا سلسلہ شروع کیا جس سے سول شہری آبادی کو نقصان پہنچا تاہم پاک فوج نے اس بلااشتعال فائرنگ کا بھی دندان شکن جواب دیتے ہوئے بھارتی بندوقوں کو خاموش کرادیا۔

پاک فوج کی جانب سے جوابی فائرنگ کے نتیجے میں بھارتی بارڈر فورس کو بھاری نقصان اٹھانا پڑا اور ان کے کچھ فوجیوں کے زخمی ہونے کی اطلاعات بھی موصول ہوئی ہیں۔

خیال رہے کہ گزشتہ روز قطر کی حکومت کی جانب سے 8 بھارتی جاسوسوں کو سزائے موت کی سزا سنائی گئی تھی جس کے بعد بھارت کو عالمی سطح پر ہزیمت کا سامنا کرنا پڑا تھا اور اب ممکنہ طور پر بھارت کی جانب سے بِلا جواز سیز فائر کی خلاف ورزی کے پیچھے یہ وجہ ہوسکتی ہے تاکہ وہ کسی طرح اس خبر کو دباسکے۔

سکیورٹی ماہرین کا کہنا ہے کہ قطر میں بھارتی جاسوسوں کی سزائے موت سے قبل بھی بھارت کینیڈا میں اپنی خفیہ ایجنسی ”را“ کی جانب سے سکھوں کی ٹارگٹ کلنگ کی وجہ سے حزیمت اٹھا چکا ہے اور اس کے علاوہ مقبوضہ کشمیرمیں کشمیریوں کی جانب سے 27 اکتوبر کو یوم سیاہ بھرپور طریقےسے منانے کی وجہ سے بھی بھارتی حکومت بوکھلاہٹ کا شکار ہے۔

سیکیورٹی ماہرین نے بتایا کہ دنیا کی توجہ کشمیر میں سیکورٹی کے بھرتے مسائل سے ہٹانے کیلئے بھی ایک روز قبل بلااشتعال فائرنگ کا ڈرامہ رچایا ہے، بین الاقوامی اور سفارتی سطح پر خودکو تنہا ہوتا دیکھ کر بھارت کی انتہا پسند حکومت نے پاکستان کے ظفر وال سیکٹر پر بلااشتعال فائرنگ کرکے دنیا کی توجہ اس رسوائی سے ہٹانے کی ناکام کوشش کی ہے۔

ماہرین نے مزید کہا کہ بھارت کو یاد رکھنا چاہئے کہ پاکستان کی بہادر افواج کسی بھی جارحیت کا بھرپور جواب دینے کی صلاحیت رکھتی ہیں اور اس کا عملی مظاہرہ ماضی میں بھی دیکھ چکا ہے۔