چیف جسٹس پشاورہائی کورٹ نے دورانِ سماعت کہا ہے کہ کوئی غلط فہمی میں نہ رہے کہ ہم کسی سیاسی پارٹی کی حمایت کررہے ہیں۔ 

تفصیلات کے مطابق پشاورہائی کورٹ میں پی ٹی آئی کے سابق سٹی صدرعرفان سلیم کے غیرقانونی حراست کے خلاف درخواست پر سماعت ہوئی۔

سماعت چیف جسٹس محمد ابراہیم خان اور جسٹس اشتیاق ابراہیم نے کی جبکہ چیف سیکرٹری، آئی جی پولیس، ایڈوکیٹ جنرل اور درخواست گزارکے وکیل علی زمان عدالت میں پیش ہوئے۔

چیف جسٹس پشاورہائی کورٹ نے کہا کہ ہمیں احساس ہے کہ آپ کی اور بھی مصروفیات ہوں گی، عدالتی احکامات کی بار بار خلاف ورزی ہورہی ہے اس لیے آپ کو بلایا ہے۔ عدالت ملزمان کو عبوری ضمانت دیتی ہے، عدالتی احکامات کے باوجود پھر ان کو دوبارہ گرفتار کیا جاتا ہے۔

چیف جسٹس محمد ابراہیم خان نے ریمارکس دیے کہ عدالتی احکامات کی خلاف وزری ہورہی ہے اور اس سے ہمیں مسئلہ ہے۔ آج آپ کو اس لئے بلایا ہے کہ آپ ہمیں یقین دہائی کرائے کہ آئندہ عدالتی احکامات کی خلاف ورزی نہیں ہوگی۔

چیف سیکرٹری نے جواب دیا کہ ہم عدالتی احکامات کے تابع ہیں اور یہ ہمارا فرض ہے۔ ہم یقین دہانی کراتے ہیں کہ آئندہ ایسا نہیں ہوگا جبکہ آئی جی پولیس نے بتایا کہ عدالتی احکامات کی خلاف وزری کا ہم سوچ بھی نہیں سکتے۔

چیف جسٹس نے کہا کہ آپ نے یقین دہائی کرائی ہمیں آپ پراعتماد ہے، اس کے بعد عدالتی احکامات کی خلاف ورزی ہوئی تو ہم کسی کے ساتھ پھر رعایت نہیں کریں گے۔ ہم یہ بھی بتانا چاہتے ہیں کہ کوئی غلط فہمی میں نہ رہے کہ ہم کسی سیاسی پارٹی کی حمایت کررہے ہیں۔

چیف جسٹس محمد ابراہیم خان نے کہا کہ عدالت میں جو بھی ہوگا قانون کے مطابق ہوگا۔ کسی بھی جج کی کوئی سیاسی وابستگی نہیں ہے، تمام ججز قانون کے مطابق فیصلے کرتے ہیں۔ 32 سال سے میں بطور جج کام کررہا ہوں آج تک کسی کی حمایت نہیں کی، تو اس کے بعد کیا کروں گا۔

چیف جسٹس پشاورہائی کورٹ نے کہا کہ جس کا جو بھی مسئلہ ہو چاہے وہ کسی بھی سیاسی پارٹی سے ہوں وہ عدالت میں آئے ہم ان کو سنیں گے۔ قانون سب کے لیے برابر ہے، عدالت میں جو بھی ہوگا قانون کے مطابق ہوگا۔

چیف سیکرٹری اور آئی جی پولیس کی یقین دہانی پرعدالت نے درخواست نمٹا دی۔

اگر آپ حالاتِ حاضرہ سے باخبر رہنا چاہتے ہیں تو ہمارےفیس بک پیج https://www.facebook.com/BOLUrduNews/ کو لائک کریں۔

ٹوئٹر پر ہمیں فالو کریں https://twitter.com/bolnewsurdu01 اور حالات سے باخبر رہیں۔

پاکستان سمیت دنیا بھر سے خبریں دیکھنے کے لیے ہمارے  کو سبسکرائب کریں   اور بیل آئیکن پر کلک کریں۔