قومی کرکٹ ٹیم کے سابق کپتان راشد لطیف کے دعوؤں سے متعلق پاکستان کرکٹ بورڈ (پی سی بی) کا ردعمل سامنے آگیا۔

پاکستان کرکٹ بورڈ (پی سی بی) ذرائع نے سابق وکٹ کیپر بلے باز راشد لطیف کے الزامات کی تردید کرتے ہوئے کہا کہ بھارت میں موجود قومی ٹیم کے کپتان بابراعظم نے ذکا اشرف سے کسی قسم کا رابطہ کرنے کی کوشش نہیں کی۔

بورڈ کے نمائندے کا کہنا تھا کہ پاکستانی ٹیم کے کپتان بابراعظم نے جمعہ کو چیف آپریٹنگ آفیسر سلمان نصیر کے ساتھ فون پر طویل بات چیت کی ہے، جس میں انہوں نے سینٹرل کنٹریکٹ کے معاملے کو حل کرنے پر مینجمنٹ کمیٹی کے سربراہ ذکا اشرف کی تعریف کی۔

پی سی بی آفیشل نے اس بات پر زور دیا کہ قومی ٹیم کے کپتان اور پی سی بی کے سربراہ کے درمیان خوشگوار بات چیت کے پیش نظر بابراعظم کو نظر انداز کرنے سے متعلق خبریں بے بنیاد ہیں۔

خیال رہے کہ سابق وکٹ کیپر راشد لطیف نے سرکاری ٹی وی چینل پر ایک پروگرام کے دوران یہ دعویٰ کیا تھا کہ بابراعظم گزشتہ دو روز سے چیئرمین ذکا اشرف سمیت پاکستان کرکٹ بورڈ (پی سی بی) حکام کو میسج کررہے ہیں لیکن کوئی جواب نہیں ملا جب کہ پاکستانی پلئیرز کو گزشتہ 5 ماہ سے تنخواہیں بھی ادا نہیں کی گئی ہیں۔

راشد لطیف نے سوال اٹھایا کہ بابراعظم نے سلمان نصیر (چیف آپریٹنگ آفیسر)، عثمان والہ (ڈائریکٹر: انٹرنیشنل کرکٹ) کو میسج کررہے ہیں تو انکے کپتان کو جواب نہ دینے کی کیا وجہ ہے؟ پھر، آپ ایک پریس بیان جاری کررہے ہیں۔