بھارت میں آئی سی سی ون ڈے ورلڈکپ کے لیے موجود پاکستانی ٹیم کے کھلاڑیوں نے سینٹرل کنٹریکٹ پر دستخط کردیے۔

بھارت میں ہونے والے آئی سی سی ورلڈکپ 2023 کے دوران پاکستان کرکٹ ٹیم اپنے ابتدائی دونوں میچز جیتنے کے بعد وہ سلسلہ برقرار نہیں رکھ سکی اور ایونٹ میں اگلے چاروں میچ میں قومی ٹیم کو شکست کا سامنا کرنا پڑا۔

قومی ٹیم کی بدترین کارکردگی کے بعد یہ خبریں سامنے آرہی تھیں کہ کھلاڑیوں کو سینٹرل کنٹریکٹ نہیں دیا جائے گا اور یہ بھی کہا جارہا تھا کہ انہیں گزشتہ 5 ماہ سے تنخواہیں بھی نہیں ملی ہیں۔

تاہم قومی کرکٹرز کو سینٹرل کنٹریکٹ کی کاپیاں کولکتہ میں موصول ہوئیں جس کے بعد چند دنوں میں کھلاڑیوں کو ان کے معاوضے ادا کردیے جائیں گے۔

ترجمان پی سی بی کا کہنا ہے ورلڈکپ کے لیے قومی ٹیم جس روز بھارت روانہ ہورہی تھی اسی روز سینٹرل کنٹریکٹ کا معاملہ طے ہوا جس کی وجہ سے دستخط نہیں ہوسکے تھے اور پھر ٹیم میچز میں مصروف ہوگئی۔

اب کولکتہ میں سب کو ہارڈ کاپی پرنٹ کراکے دے دی گئی اور سب کھلاڑیوں نے دستخط کردیے ہیں، ان کو چند دنوں میں معاوضوں کی ادائیگی بھی کردی جائے گی۔ پی سی بی نے 27 کھلاڑیوں کے سینٹرل کنٹریکٹ کو حتمی شکل دی ہے جس میں 127 سے 202 فیصد اضافہ کیا گیا ہے۔

دوسری جانب ذرائع کا کہنا ہے کہ سینٹرل کنٹریکٹ میں تاخیر کھلاڑیوں کے تحفظات اور بار بار مذاکرات کی وجہ سے ہوئی، ایشیا کپ میں بھی سینٹرل کنٹریکٹ کی پیشکش کی گئی تھی لیکن وہاں بھی معاملات طے نہیں ہوئے۔