آئی سی سی ورلڈکپ 2023 کے 22ویں میچ میں افغانستان نے پاکستان کو 8 وکٹوں سے شکست دے دی۔

آئی سی سی مینز کرکٹ ورلڈکپ کا 22واں میچ پاکستان اور افغانستان کی ٹیموں کے درمیان بھارتی شہر چنئی میں کھیلا گیا جس میں افغانستان نے جارحانہ کھیل پیش کرکے جیت اپنے نام کی۔

پاکستان نے پہلے بیٹنگ کرتے ہوئے مقررہ 50 اوورز میں 7 وکٹوں کے نقصان پر 282 رنز بنائے جس کے جواب میں افغانستان نے مقررہ ہدف 2 وکٹوں کے نقصان پر 49 اوورز میں پورا کرلیا۔

افغانستان کی جانب سے رحمان اللہ گرباز اور ابراہم زردان نے ٹیم کو 130 رنز کا پراعتماد آغاز فراہم کیا۔ اس دوران دونوں بلے بازوں نے اپنی نصف سنچریاں بھی مکمل کیں۔

رحمان اللہ گرباز 53 گیندوں پر 65 رنز کی اننگز کھیلی جس میں ایک چھکا اور 9 چوکے شامل تھے جب کہ ابراہیم زادران نے 87 رنز کی شاندار اننگز کھیلی۔

رحمت شاہ 77 اور کپتان حشمت اللہ شاہدی 48 رنز کے ساتھ ناقابل شکست رہے جب کہ پاکستان کی جانب سے شاہین آفریدی اور حسن علی نے ایک ایک کھلاڑی کو آؤٹ کیا۔

اس سے قبل قومی ٹیم کے کپتان بابراعظم نے ٹاس جیت کر پہلے خود بیٹنگ کرنے کا فیصلہ کیا۔ پاکستان کی جانب سے عبداللہ شفیق اور امام الحق نے اننگز کا آغاز کیا۔ عبداللہ شفیق نے افغانستان کے خلاف کھیلتے ہوئے فاسٹ بولر نوین الحق کو پانچویں اوور میں شاندار چھکا رسید کیا اور انہوں نے اگلے ہی اوور میں اسپنر مجیب الرحمان کو بھی چھکا لگایا۔

عبداللہ شفیق جارحانہ موڈ میں دکھائی دے رہے تھے تاہم امام الحق 17 رنز کی انفرادی اننگز کھیلنے کے بعد آؤٹ ہوگئے جس کے بعد کپتان بابراعظم نے عبداللہ شفیق کا ساتھ دیا اور دونوں نے ذمہ دارانہ اننگز کھیلتے ہوئے نصف سنچریاں اسکور کیں۔

عبداللہ شفیق 58 رنز بنانے کے بعد نور احمد کو وکٹ دے بیٹھے جس کے بعد ان فارم بلے باز محمد رضوان بیٹنگ کے لیے آئے لیکن وہ بھی صرف 8 رنز بنانے کے بعد نور احمد کا شکار بن گئے۔ سعود شکیل بھی اپنی لمبی اننگز نہ کھیل سکے، وہ 25 رنز بنانے کے بعد آؤٹ ہوئے۔

بابراعظم نے 92 گیندوں پر 74 رنز کی اننگز کھیلی جس میں صرف 4 چوکے اور ایک چھکا شامل تھا۔

افغانستان کی جانب سے ورلڈکپ میں ڈیبیو کرنے والے نوجوان اسپنر نور احمد نے 3 وکٹیں حاصل کیں، نوین الحق نے 2 کھلاڑیوں کو پویلین کی راہ دکھائی جب کہ محمد نبی اور عظمت اللہ عمرزئی کے حصے میں ایک ایک وکٹ آئی۔

آج کے میچ کے لیے پاکستان نے محمد نواز کی جگہ شاداب خان کو اسکواڈ میں شامل کیا ہے جب کہ افغانستان نے بھی ٹیم میں ایک تبدیلی کرتے ہوئے فضل الحق فاروقی کی جگہ نوجوان اسپنر نور احمد کو ٹیم کا حصہ بنایا ہے۔

Will Pakistan get back in the race?

Changes for 🇵🇰: Shadab Khan in for Mohammad Nawaz
Changes for 🇦🇫: Noor Ahmad replaces Fazalhaq Farooquihttps://t.co/xO8YXZXE50 | #CWC23 | #PAKvAFG pic.twitter.com/CEMQtf6FbD

— ESPNcricinfo (@ESPNcricinfo) October 23, 2023