زینب عباس کے خلاف پروپیگنڈہ کرنیوالے بھارتی وکیل نے پریزینٹر کے بھارت چھوڑنے کو بڑی فتح قرار دیدیا

گزشتہ روز بھارت میں انٹرنیشنل کرکٹ کونسل (آئی سی سی) ون ڈے ورلڈکپ میں میزبانی کے فرائض سرانجام دینے والی پاکستانی پریزینٹر زینب عباس سیکیورٹی مسائل کی وجہ سے بھارت چھوڑ کر دبئی روانہ ہوگئی تھیں۔

ذرائع کے مطابق بھارت میں ایک وکیل نے زینب عباس کے خلاف کیس کرنے کی درخواست کی تھی، انہوں نے یہ درخواست 4 اکتوبر کو دائر کی جس میں زینب عباس پر 9 سال قبل ہندو مخالف ٹوئٹ کرنے کا الزام عائد کیا گیا۔ بعد ازاں زینب عباس کو بھارت سے ڈی پورٹ کردیا گیا۔

تاہم انٹرنیشنل کرکٹ کونسل (آئی سی سی) کے ترجمان نے زینب عباس کو ڈی پورٹ کرنے کی تردید کرتے ہوئے کہا کہ زینب عباس ذاتی مصروفیات کی وجہ سے بھارت چھوڑ کر گئی ہیں۔

دوسری جانب بھارتی وکیل وینیت جندال نے ہٹ دھرمی کا مظاہرہ کرتے ہوئے سوشل میڈیا پر ایک بیان میں پاکستانی پریزینٹر زینب عباس کے بھارت چھوڑنے کو بڑی فتح قرار دیا۔

وکیل وینیت جندال نے لکھا زینب عباس کے خلاف ایکشن لینے پر شکرگزار ہوں، ساتھ ہی وکیل نے اعلیٰ بھارتی حکام کا شکریہ ادا کیا کہ انہوں نے بروقت کارروائی کی۔

بھارتی وکیل کا کہنا تھا کہ زینب کو بھارت سے نکالا گیا ہے تاہم آئی سی سی کے ترجمان پہلے ہی زینب عباس کو ڈی پورٹ کرنے کی خبروں کی تردید کرچکے ہیں۔