یہ لرزہ خیز واردات بھارت کی ریاست راجستھان میں پیش آئی جہاں ایک سنگ دل شخص نے زمین کے ٹکڑے کے لیے بھائی کو بے دردی سے مار ڈالا۔

بھارتی میڈیا کی رپورٹس کے مطابق راجستھان کے بھرت پور کے علاقے میں زمین کے تنازعے پر دو بھائیوں کے درمیان تکرار جاری تھی، جس پر دامودر نے اپنے بھائی نرپت کو ٹریکٹر تلے روند کر مار ڈالا۔

پولیس نے بتایا کہ ملزم دامودر نے مبینہ طور پر ٹریکٹر کو اپنے بھائی نرپت پر آٹھ بار آگے پیچھے چلایا یہاں تک کہ اس کی موت ہو گئی۔

بہادر سنگھ اور اتار سنگھ کے اہل خانہ کے درمیان بھرت پور میں زمین کے ایک ٹکڑے پر طویل عرصے سے تنازعہ تھا۔ آج صبح بہادر سنگھ کی فیملی ٹریکٹر پر بیٹھ کر متنازعہ زمین پر پہنچی جبکہ اتار سنگھ کا خاندان کچھ دیر بعد آیا۔

جلد ہی دونوں خاندانوں کے درمیان تصادم ہوا اور انہوں نے ایک دوسرے پر لاٹھیوں اور پتھروں سے حملہ کرنا شروع کر دیا۔ گاؤں والوں نے دعویٰ کیا کہ انہوں نے گولیوں کی آوازیں سنی ہیں۔

پولیس نے بتایا کہ تصادم کے دوران جب اتار سنگھ کا ایک بیٹا نرپت زمین پر گر گیا، تو اس کے بھائی نے اسے ٹریکٹر سے آٹھ بار کچل دیا، یہاں تک کہ اس کی موت ہو گئی۔

دامودر کے اہل خانہ نے بھی اسے روکنے کی کوشش کی لیکن دامودر نے مبینہ طور پر رکنے سے انکار کر دیا اور اپنے بھائی کو موقع پر ہی بے رحمی سے قتل کر دیا۔

جھڑپوں میں تقریبا 10 افراد زخمی ہوئے ہیں اور ان کا اسپتال میں علاج جاری ہے۔ پولیس نے مقدمہ درج کرکے چار افراد کو تفتیش کے لئے حراست میں لے لیا ہے۔

اطلاعات کے مطابق، دونوں خاندانوں کے درمیان پانچ دن پہلے تصادم ہوا تھا، جب بہادر سنگھ اور اس کا چھوٹا بھائی جنک زخمی ہو گئے تھے۔ اہل خانہ نے اتار سنگھ کے بیٹے نرپت سمیت ان کی فیملی کے خلاف مقدمہ درج کرایا تھا۔

اگر آپ حالاتِ حاضرہ سے باخبر رہنا چاہتے ہیں تو ہمارےفیس بک پیج https://www.facebook.com/BOLUrduNews/ کو لائک کریں