الاسکا ایئر لائنز کے مسافر طیارے کو حادثے کا نشانہ بنانے کی کوشش کرنے والے پائلٹ پر فرد جرم عائد کر دی گئی۔

برطانوی خبر رساں ادارے کے مطابق ایک آف ڈیوٹی پائلٹ پر قتل کی کوشش کے 83 الزامات عائد کیے گئے ہیں، جس نے اتوار کی رات ایک پرواز کے دوران مبینہ طور پر ایک مسافر طیارے کو حادثے کا نشانہ بنانے کی کوشش کی تھی۔

ایئر لائن کے بیان کے مطابق مشتبہ شخص الاسکا ایئر لائنز کی پرواز کے کاک پٹ میں کپتان اور فرسٹ آفیسر کے پیچھے بیٹھا ہوا تھا۔

پولیس کی جانب سے جاری دستاویزات میں مشتبہ شخص کا نام 44 سالہ جوزف ڈیوڈ ایمرسن بتایا گیا ہے۔

یہ طیارہ واشنگٹن کے شہر ایورٹ سے کیلیفورنیا کے شہر سان فرانسسکو جا رہا تھا جس میں 80 مسافر سوار تھے۔

حکام کا کہنا ہے کہ طیارے کا رخ پورٹ لینڈ، اوریگون کی جانب موڑ دیا گیا اور مشتبہ شخص کو بغیر کسی حادثے کے قابو کر لیا گیا۔

الاسکا ایئرلائنز کی جانب سے جاری بیان میں کہا گیا ہے کہ آف ڈیوٹی پائلٹ فلائٹ ڈیک جمپ سیٹ پر سفر کر رہا تھا جب اس نے انجنوں کے آپریشن میں خلل ڈالنے کی ناکام کوشش کی۔

الاسکا ایئرلائنز کی پرواز 2059 کے عملے کے ارکان نے ایئر ٹریفک کنٹرول کو اس واقعے کی اطلاع دی۔

ایئر ٹریفک کنٹرول کمیونیکیشن کی ریکارڈنگ میں ایک پائلٹ کو یہ کہتے ہوئے سنا گیا کہ ‘ہم نے ایک شخص کو قابو کیا ہے جس نے کاک پٹ سے انجن بند کرنے کی کوشش کی ہے۔

ہورائزن ایئر کی جانب سے چلائی جانے والی اس پرواز کو مقامی وقت کے مطابق 17 بجکر 25 منٹ پر اڑان بھرنی تھی اور 19 بج کر 30 منٹ پر سان فرانسسکو پہنچنا تھا۔

تاہم ، پرواز کو پورٹ لینڈ کی طرف موڑ دیا گیا اور آخر کار 19:18 پر وہاں سے اپنی مطلوبہ منزل کے لئے اڑان بھری۔

الاسکا ایئرلائنز کی جانب سے جاری بیان میں کہا گیا ہے کہ طیارے میں سوار تمام مسافروں کو دوسرے طیارے کے ذریعے سان فرانسسکو روانہ کیا گیا۔

الاسکا ایئرلائنز کا کہنا ہے کہ اس واقعے کی تحقیقات پورٹ آف پورٹ لینڈ پولیس ڈپارٹمنٹ اور ایف بی آئی کر رہی ہے۔

اگر آپ حالاتِ حاضرہ سے باخبر رہنا چاہتے ہیں تو ہمارےفیس بک پیج https://www.facebook.com/BOLUrduNews/ کو لائک کریں

ٹوئٹر پر ہمیں فولو کریں https://twitter.com/bolnewsurdu01 اور حالات سے باخبر رہیں

پاکستان سمیت دنیا بھر سے خبریں دیکھنے کے لیے ہمارے  کو سبسکرائب کریں   اور بیل آئیکن پر کلک کریں