برطانیہ میں سمندری طوفان ’سیاران‘ نے تباہی مچا دی ہے اور ملک کی متعدد کاؤنٹیز میں بجلی کی فراہمی معطل ہو چکی ہے۔

برطانوی خبر رساں ادارے کی خبر کے مطابق سمندری طوفان سیاران نے برطانیہ کے ڈیون اور کورن وال، سسیکس، سرے اور چینل جزائر میں 10 ہزار سے زائد گھروں کو بجلی سے محروم کردیا ہے۔

برطانیہ کے سب سے زیادہ متاثرہ جنوبی انگلینڈ میں 300 سے زائد اسکول بند ہیں جن میں سے زیادہ تر ڈیون میں ہیں۔

جرسی میں 102 میل فی گھنٹہ کی رفتار سے چلنے والی آندھی سے گھروں کو نقصان پہنچنے کے بعد درجنوں افراد کو رات بھر ہوٹلوں میں منتقل کر دیا گیا۔

طوفان میں چلنے والی تیز ہواؤں کے باعث متعدد عمارتوں کی چھتیں اڑ گئی ہیں، ہزاروں افراد بجلی سے محروم ہیں اور کچھ ٹرین لائنیں مکمل طور پر رک گئی ہیں۔

سمندری طوفان ’سیاران‘ کے اثرات فرانس میں بھی دیکھے گئے جہاں تیز ہوا سے گرے ہوئے درخت کی ٹکر سے ایک لاری ڈرائیور ہلاک ہو گیا ہے جبکہ 12 لاکھ افراد بجلی سے محروم ہیں۔

ڈوور کی بندرگاہ نے پہلے ہی تمام بحری جہازوں سمندر میں جانے سے روک دیا تھا، جس کی وجہ سے لاریوں کی لمبی قطاریں لگ گئی تھیں – اب اسے شپنگ کے لئے دوبارہ کھول دیا گیا ہے لیکن مسافر کشتیاں منسوخ کردی گئی ہیں۔

انگلینڈ، اسکاٹ لینڈ اور ویلز کے کچھ حصوں میں خطرناک موسم کی وارننگ جاری کی گئی ہے جو جان و مال کے لیے ممکنہ خطرے کی نشاندہی کرتی ہے۔

اگر آپ حالاتِ حاضرہ سے باخبر رہنا چاہتے ہیں تو ہمارےفیس بک پیج https://www.facebook.com/BOLUrduNews/ کو لائک کریں