ہزاروں فلسطینیوں کی شہادت کے بعد غزہ میں آج سے چار روزہ جنگ بندی کا آغاز

ویب ڈیسک

24th Nov, 2023. 01:59 pm
شيئر
- Font size
  - Small
  - Medium
  - Large
- Dark Mode
- Save
- Print

آرٹیکلز

Now Reading:

ہزاروں فلسطینیوں کی شہادت کے بعد غزہ میں آج سے چار روزہ جنگ بندی کا آغاز

اسرائیل اور حماس کے درمیان غزہ میں گزشتہ 7 ہفتوں سے جاری لڑائی میں آج سے 4 روزہ جنگ بندی کا آغاز ہوگیا ہے۔

غیر ملکی خبررساں ادارے کی رپورٹ کے مطابق 14 ہزار سے زائد فلسطینیوں کی شہادت کے بعد بلآخر اسرائیل کو جنگ بندی کا خیال آگیا۔ جمعے کی صبح سے شروع ہونے والے اس عارضی جنگ بندی کے دوران حماس کے پاس موجود 50 اسرائیلی یرغمالیوں اور اسرائیل کی جیلوں میں قید خواتین اور بچوں سمیت 150 فلسطینیوں کی رہائی پر اتفاق کیا گیا ہے۔

حماس نے اسرائیل کے ساتھ جنگ بندی کی تصدیق کرتے ہوئے کہا کہ جنگ بندی جمعہ کو مقامی وقت کے مطابق صبح 7 بجے سے نافذ العمل ہوگی جو چار دن تک جاری رہے گی۔ جنگ بندی کے دوران فریقین تمام فوجی سرگرمیاں روک دیں گے۔

اسرائیل نے حماس کو مزید یرغمالیوں کی رہائی کی ترغیب دیتے ہوئے جنگ بندی کی مدت میں اضافے کی پیشکش بھی کی ہے تاہم ساتھ ہی اسرائیل نے یہ واضح بھی کیا ہے کہ اس لڑائی میں عارضی وقفہ حماس کے ساتھ جنگ کو ختم نہیں کرسکتا۔

اگرچہ یہ معاہدہ غزہ کے لوگوں کو شمال سے جنوب تک محفوظ راستے کی اجازت دے گا، لیکن یہ شمال سے بے گھر ہونے والے لاکھوں لوگوں کو گھر واپس جانے کی اجازت نہیں دے گا۔

فلسطینی میڈیا نے رپورٹ کیا ہے کہ جنگ بندی کے بعد جنوب میں عارضی رہائش اختیار کیے فلسطینی شہریوں نے جب واپس اپنے مقامات پر جانے کی کوشش کی تو اسرائیلی فورسز نے انہیں روکنے کی کوشش میں عوام پر شیلنگ کی جس کے نتیجے میں متعدد افرد زخمی ہوگئے ہیں جب کہ اسرائیلی قید میں موجود فلسطینی عوام کے اہلخانہ تاحال ان کی رہائی کے منتظر ہیں۔

اسرائیلی فورسز نے فلسطینی شہریوں کو مخاطب کیا ہے کہ شمالی غزہ ایک خطرناک علاقہ ہے لہذا شمال کی جانب سفر کرنے کی اجازت نہیں ہے اور اگر آپ اپنا تحفظ چاہتے ہیں تو جنوب میں ہی رہیں۔

خیال رہے کہ سرائیل نے حماس کے حملے کے جواب میں غزہ میں بجلی اور پانی کی سپلائی منقطع کر دی ہے جبکہ خوراک، ایندھن اور دیگر سامان کی ترسیل بھی روک دی گئی تھی تاہم اس معاہدے کے تحت اب امدادی ٹرک غزہ میں داخل ہوسکیں گے اور الجزیرہ کی رپورٹ کے مطابق آج صبح تیل، گیس اور دیگر سامان سے لدے امدادی ٹرک کو رفع بارڈ سے غزہ میں داخل ہوتے ہوئے دیکھا گیا ہے۔

اقوام متحدہ کے مطابق غزہ میں جنگ کے آغاز سے قبل یہاں امداد کے ماہانہ اوسطا دس ہزار ٹرک آتے تھے مگر گذشتہ ماہ کے دوران صرف 1,399 ٹرکوں کو ہی مصر کے راستے غزہ آنے کی اجازت دی گئی ہے۔ جنگ کے پہلے ہی ہفتے میں اسرائیل نے ایندھن کی سپلائی یہ کہتے ہوئے روک دی تھی کہ حماس اسے چوری کر کے فوجی مقاصد کے لیے استعمال کر سکتی ہے۔