بھارت اور آسٹریلیا کے درمیان کل ہونے والے فائنل کے لیے بنائی گئی پچ سے متعلق تفصیلات سامنے آگئیں۔ 

بھارت میں ہونے والے آئی سی سی مینز کرکٹ ورلڈکپ 2023 کا فائنل 19 نومبر یعنی کل بروز اتوار کو احمد آباد کے نریندر مودی اسٹیڈیم میں کھیلا جائے گا۔

ورلڈکپ کے آخری اور سب سے بڑے معرکے میں ایونٹ میں ناقابلِ شکست رہنے والی بھارتی ٹیم 5 مرتبہ کی ورلڈ چیمپئن آسٹریلیا سے ٹکرائے گی جب کہ چوتھی مرتبہ ورلڈکپ کا فائنل کھیلنے والی میزبان ٹیم 2 بار چیمپئن کا تاج اپنے سر پر سجا چکی ہے۔

یاد رہے کہ آئی سی سی ورلڈکپ 2023 کے لیگ میچ میں بھارت نے آسٹریلیا کو شکست سے دوچار کیا تھا۔

Advertisement

Captain Pat Cummins inspects the pitch ahead of the final 🔍#CWC23 #INDvAUS pic.twitter.com/fUNpHgJXtd

— ICC Cricket World Cup (@cricketworldcup) November 18, 2023

بھارتی میڈیا رپورٹس کے مطابق بھارت اور آسٹریلیا کے درمیان ورلڈکپ فائنل کے لیے پچ کی تیاری حتمی مرحلے میں داخل ہوگئی ہے۔

قبل ازیں بھارت اور نیوزی لینڈ کے درمیان ہونے والے ورلڈکپ کے پہلے سیمی فائنل میں پچ سے متعلق آئی سی سی اور بی سی سی آئی کو شدید تنقید کا سامنا کرنا پڑا تھا کیوں کہ انتہائی اہم میچ میں پرانی پچ استعمال کی گئی تھی.

رپورٹس میں دعویٰ کیا گیا ہے کہ نریندر مودی کرکٹ اسٹیڈیم میں ہونے والے فائنل میچ کے لیے بنائی گئی پِچ سِلو ہوگی اور یہ پچ پاک بھارت میچ جیسی ہوگی جو کہ 14 اکتوبر کو کھیلا گیا تھا، یہ پچ بلے بازوں اور بولرز دونوں کے لیے سازگار ہے۔

پچ کیوریٹر نے بھارتی میڈیا کو بتایا کہ پہلے بیٹنگ کرنے والی ٹیم کے لیے 315 تک بہترین اسکور ہوسکتا ہے، یہ ایک قابل دفاع اسکور ہوگا کیونکہ بعد میں بیٹنگ کرنے والی ٹیم کو مشکلات کا سامنا کرنا پڑے گا۔

خیال رہے کہ ورلڈکپ کے پہلا سیمی فائنل ہائی اسکورنگ میچ تھا جس میں بھارت نے نیوزی لینڈ کو 70 رنز سے شکست دیکر فائنل میں رسائی حاصل کی تھی جب کہ دوسرا سیمی فائنل میں پچ سلو تھی جہاں آسٹریلیا نے انتہائی دلچسپ مقابلے کے بعد جنوبی افریقا کو شکست دیکر ان کے فائنل میں پہنچنے کے خواب کو چکنا چور کردیا تھا۔