شمالی کوریا نے بین البراعظمی بیلسٹک میزائل کی لانچنگ کی پہلی سالگرہ کے موقع پر ملک بھر میں عام تعطیل کا اعلان کر دیا ہے۔

عرب میڈیا کی رپورٹ کے مطابق شمالی کوریا نے گزشتہ برس اپنے بین البراعظمی بیلسٹک میزائل ہواسونگ-17 کے کامیاب تجربے کی سالگرہ منانے کے لیے ایک نئی تعطیل کا اہتمام کیا ہے۔

18 نومبر، 2022 کو پیانگ یانگ نے ہواسونگ -17 کی پہلی مکمل پرواز کا کو کامیاب تجربہ کیا تھا جسے تجزیہ کاروں نے “مونسٹر میزائل” کا نام دیا ہے۔

شمالی کوریا کی سینٹرل نیوز ایجنسی نے اتوار کے روز کہا کہ سپریم پیپلز اسمبلی کے پریزیڈیم کے اجلاس میں سالگرہ کو تعطیل کے طور پر مقرر کیا گیا ہے۔

سرکاری نیوز ایجنسی کے مطابق میزائل انڈسٹری ڈے کا قیام قومی دفاع کی ترقی کے ہمارے مقدس سفر میں ایک خاص واقعہ ہے۔

بیان میں مزید کہا گیا ہے کہ اس تجربے کے ساتھ ہی شمالی کوریا نے دنیا کے سامنے ایک عالمی معیار کی جوہری طاقت اور مضبوط ترین بین البراعظمی بیلسٹک میزائل کی عظمت کا مظاہرہ کیا ہے۔

شمالی کوریا اکثر اہم تعطیلات کے موقع پر ہتھیاروں کے بڑے تجربات کرتا ہے اور سیئول کی خفیہ ایجنسی نے گزشتہ ہفتے کہا تھا کہ ملک فوجی جاسوس سیٹلائٹ کے تیسرے لانچ کی تیاری کے آخری مراحل میں ہے۔

اگست میں دوسری کوشش کی ناکامی کے بعد پیانگ یانگ نے کہا تھا کہ وہ اکتوبر میں تیسرا تجربہ کرے گا۔

تجزیہ کاروں کا کہنا ہے کہ خلائی لانچ کی صلاحیتوں اور بین البراعظمی بیلسٹک میزائلوں کی تیاری کے درمیان اہم تکنیکی ہم آہنگی ہے، جس پر پیانگ یانگ پر اقوام متحدہ کی متعدد پابندیوں کے تحت پابندی عائد ہے۔

شمالی کوریا نے امریکہ، جنوبی کوریا اور ان کے اتحادیوں کے انتباہ کو نظر انداز کرتے ہوئے رواں سال ریکارڈ تعداد میں میزائل تجربات کیے ہیں۔

ستمبر میں پیانگ یانگ نے اپنے آئین میں جوہری طاقت کی حیثیت کو شامل کیا تھا اور رہنما کم جونگ ان نے امریکہ کی جانب سے ممکنہ خطرات کا مقابلہ کرنے کے لیے مزید جدید جوہری ہتھیاروں کی ضرورت پر زور دیا تھا۔

اگر آپ حالاتِ حاضرہ سے باخبر رہنا چاہتے ہیں تو ہمارےفیس بک پیج https://www.facebook.com/BOLUrduNews/ کو لائک کریں