پاکستان کرکٹ ٹیم کے سابق کپتان جاوید میانداد کا کہنا ہے کہبابر اعظم کو کپتانی سے ہٹانے کا فیصلہ درست نہیں ہے، کرکٹرز کو احترام اور عزت دی جائے۔ 

نجی ٹی وی کو دیے گئے خصوصی انٹریو میں قومی ٹیم کے سابق کپتان اور کوچ جاوید میانداد نے کرکٹ بورڈ کے فیصلوں پر تنقید کرتے ہوئے کہا کہ  وہ لوگ کرکٹ چلارہے ہیں جن کا کرکٹ سے کوئی تعلق نہیں ہے، اس لیے غلط فیصلے ہورہے ہیں، سیاسی اثر و رسوخ سے پی سی بی میں آنے والے کھیل کو نا قابل تلافی نقصان پہنچا رہے ہیں۔

بابراعظم سے متعلق پوچھے گئے سوال پر انہوں نے کہا کہ ملک کے سب سے بڑے کھلاڑی کی تضحیک کی گئی، بابر اعظم کو کپتانی سے ہٹانے کا فیصلہ درست نہیں ہے، کرکٹرز کو احترام اور عزت دی جائے۔

جاوید میانداد کا کہنا تھا کہ  بابراعظم کے ساتھ کوئی تگڑا مینیجر رکھا جاتا تاکہ وہ مضبوط کپتان بنتا، ائیر مارشل نورخان نے مجھے کپتان بناکر مشتاق محمد کو مینیجر بنایا تھا، بابر جیسے بڑے کھلاڑی کے ساتھ پی سی بی کا حالیہ سلوک افسوس ناک ہے۔

لیجنڈری کرکٹرنے کہا کہ بابراعظم کی تکنیک میں معمولی خامی ہے، وہ کریز پر جاکر بولر پر اٹیک نہیں کرتا ہے جس کی وجہ سے اس کی بیٹنگ میں تسلسل دکھائی نہیں دیتا لہذا بابر کو اپنے انداز میں تھوڑی بہت تبدیلی لانے کی ضرورت ہے۔

جاوید میانداد کا مزید کہنا تھا کہ بابر اعظم کو کوئی بتانے والا نہیں ہے اس میں ساری کوالٹی ہے لیکن اسے کوئی نیٹ پر بتانے والا نہیں ہے، وہ اپنی خامیوں کو بار بار دہرا رہا ہے۔ نیٹ پر غلطیاں دور کرنے سے اس میں اعتماد ہوگا وہ اور اچھا بیٹر بنے گا۔